Миллиардер Илон Маск АКШда үчүнчү саясий күч болуп чыгышы күтүлгөн «Америкалык партияны» түзүү идеясынан убактылуу баш тартты. Маалыматка караганда, Маск республикачыл шайлоочулар арасында жик жаратууну каалабайт жана вице-президент Жей Ди Вэнс менен мамилесине зыян келтирүүдөн чочулайт.
Wall Street Journal гезитинин маалыматына ылайык, Маск июнь айынын башында жарыялаган ниетин кайра карап чыгып, өз компанияларын башкарууга көбүрөөк көңүл бурууну чечкен. Анын пикиринде, жаңы партия түзүү Республикалык партиянын колдоосун алсыратышы мүмкүн жана анын саясий байланыштарына таасир этет.
Басылманын булагы билдиргендей, Маск үчүн Жей Ди Вэнс менен жакшы мамилени сактоо маанилүү, анткени ал 2028-жылдагы президенттик шайлоого талапкерлигин койсо, аны финансылык жактан колдошу мүмкүн экени айтылууда.
Үчүнчү партияны түзүүгө даярдык көргөн уюм менен күтүлгөн жолугушуу июль айынын аягында Масктын бизнеске байланышкан артыкчылыктарына байланыштуу жокко чыгарылган.
Буга чейин Маск «Америкалык партиянын» башкы максаты – Жеффри Эпштейн иши боюнча бардык материалдарды ачыктоо болорун айткан.
Трамп менен Масктын ортосундагы пикир келишпестиктер
АКШ президенти Дональд Трамп менен Масктын мамилеси Конгрессте сунушталган салык жеңилдиктери боюнча мыйзам долбоорун ишкер катуу сынга алгандан кийин начарлап кеткен.
Трамп бул абалды комментарийлеп жатып:
«Биздин мамилебиз жакшы эле болчу, бирок эми ишенбей калдым. Мен ага көп жардам бергем, эми катуу нааразы болдум», – деген.
Буга жооп иретинде Маск:
«Эгер мен болбосом, Трамп шайлоодо утулуп калмак», – деп билдирген.



















