Казакстандын борбору Астанада 2035-жылга чейинки транспорттук системаны өнүктүрүү боюнча комплекстүү программа ишке ашырылып жатат. Бул программа 2024-жылдын 11-декабрында шаардык маслихаттын чечими менен бекитилгенин Kazinform агенттигинин кабарчысы маалымдайт.
— Программа шаардын транспорттук тармагын жакшыртууга жана тыгын маселесин чечүүгө багытталган. Бул коомдук транспорттун үлүшүн көбөйтүү, жөө жүргүнчүлөр үчүн шарттарды жакшыртуу, тоскоолдуксуз чөйрө түзүү жана шаар ичинде жүргөн жеке унаалардын санын азайтуу аркылуу ишке ашат, — деп айтылат Премьер-министр Олжас Бектеновдун депутаттык суроого берген жообунда.
Анын айтымында, программа үч негизги багытты камтыйт:
Биринчиси — 2025-жылдын 23-мартындагы №503-840 токтомунун негизинде Астана шаарынын акимдигинин чечими менен транспорттук комплексти башкаруу боюнча адистештирилген уюм — Жол кыймылын уюштуруу борбору (ЖКУБ) түзүлгөн.
ЖКУБдун негизги милдеттери төмөнкүлөр болуп эсептелет:
-
транспорт агымдарын борборлоштуруп башкаруу;
-
унаа токтотуучу жайларды натыйжалуу жөнгө салуу;
-
шаар көчө-жол тармагынын өткөрүмдүүлүгүн жогорулатуу;
-
шаар ичинде транспорттук жеткиликтүүлүктү жакшыртуу.
Азыркы тапта борборду керектүү жабдуулар менен камсыз кылуу жана тийиштүү адистерди даярдоо иштери жүрүп жатат.
Экинчиси — ылдам кыймылдаган коомдук транспорттун негизин түзүү.
— Бул багытта 7 көчөнү ылдам коридорлорго реконструкциялоо иши башталды (2025–2026-жылдарга пландалган). Коомдук транспорт үчүн паркингди да жаңылоо иштери кызуу жүрүүдө. 2024-жылы 305 автобус сатып алынган, ал эми 2025-жылы дагы 300 автобус алуу пландалууда. Бул демилгелер коомдук транспорттун тыгыны күчөгөн сааттарындагы орточо ылдамдыгын 20%га чейин жогорулатууга шарт түзөт, — деди Өкмөт башчы.
Үчүнчүсү — жасалма интеллектти колдонуу менен электрондук транспорттук моделди иштеп чыгуу.
О. Бектеновдун айтымында, учурда шаар көчөлөрүнө күн сайын 550–600 миңге жакын унаа чыгат.
— Эң тыгыз транспорт агымы «Мәңгілік Ел», «Кабанбай Батыр», «Туран» проспектилеринде, ошондой эле Сарайшык жана Кунаев көчөлөрүндө байкалууда. Азыркы учурда Есиль районунун аймагынан баштап тыгын маселесин комплекстүү чечүү үчүн маалымат чогултуу иштери жүрүп жатат. Электрондук транспорттук модель шаардагы транспорттук чечимдерди чоң маалыматты талдоо жана кыймылды алдын ала божомолдоо аркылуу негиздөөгө жардам берет, — деп белгиледи Премьер-министр.
Ошондой эле, системаны иштеп чыгуу 2025-жылдын аягына чейин бүткөрүлөрүн кошумчалады. Бул иштер Евразия өнүктүрүү банкынын гранттык каржылоосу аркылуу жүргүзүлүп жатат.
Буга чейин Астана, Алматы жана Шымкент шаарларынын көчөлөрүн өнүктүрүүгө 1,9 трлн теңге талап кылынары айтылган болчу.

















