Кыргызстандын “Элкарт” улуттук төлөм системасынын картасы Россияда келерки жылдан тарта ишке киргизилиши мүмкүн.
Бул тууралуу Санкт-Петербург эл аралык экономикалык форумунун алкагында Кыргызстандын Экономика жана коммерция министри Данияр Амангелдиев журналисттерге ТАСС агенттигинин суроосуна жооп берип жатып билдирди.
Амангелдиев тараптар бул маселенин үстүнөн тыгыз иштешип жатканын белгилеген.
Экономика жана коммерция министрлиги бул боюнча маалымат бере элек.
Улуттук “Элкарт” төлөм картасы Кыргызстанда эң көп колдонулган карталардын бири.
Былтыркы расмий маалыматта 4,3 миллиондон ашкан банк карталарынын 60% “Элкарт”, 40% Visa экени белгилүү болгон.
