Бүгүн, 16-майда Ош шаарына келген Өзбекстандын Андижан облусунун акими Шухратбек Абдурахманов баштаган делегацияны президенттин Ош облусундагы ыйгарым укуктуу өкүлү Эльчибек Джантаев тосуп алды.
Андижан делегациясынын иш сапарынын максаты – Ош облусунун өндүрүш жана туризм тармактары менен таанышуу, ошондой эле облустар ортосунда тажрыйба алмашуу.
Делегация облустун бир катар өнөр жай объектилерин кыдырып, анда делегациянын өкүлдөрү инфраструктура, өндүрүш процесстери менен таанышып, жергиликтүү ишканалардын жетекчилери жана бизнес өкүлдөрү менен жолугушту.
Бул сапар Ош облусу менен Андижан облусунун ортосундагы достук байланыштарды чыңдоодогу маанилүү кадам болуп саналат, ошондой эле экономика, өнөр жай, туризм тармагында өз ара пайдалуу кызматташтыкты өнүктүрүүгө өбөлгө түзөт.
Эки тарап тең тажрыйба алмашуу жана өз ара аракеттенүү өз жемишин берип, аймактарыбыздын ортосундагы өнөктөштүктү мындан ары да чыңдоого өбөлгө болоруна ишенимдерин билдирди.
Иш сапардын алкагында өзбекстандык делегацияга Алай районунда “Айыл кечи” жармаңкеси көрсөтүлдү. 7 боз үй тигилген иш чарага Алай жана Чоң-Алай райондорунда аары багып, мал чарбачылык менен алектенген ишкерлер катышты. Ал жерде кыргыз улуттук кийимдердин көргөзмөсү да көрсөтүлдү.


















