Өзбекстан менен Кыргызстан соттолгон жарандарын бири-бирине өткөрүп беришет. Бул мыйзамды Өзбекстандын Олий Мажлисинин Мыйзам чыгаруу палатасы 31-январдагы жыйынында кабыл алды.
Учурда Өзбекстанда 45 кыргызстандык, Кыргызстанда 96 өзбекстандык абактагы жаза мөөнөтүн өтөп жатат. Бул маалыматты газета.uz жазды.
Аталган келишимди ратификациялоо боюнча мыйзамды Олий Мажлисинин Мыйзам чыгаруу палатасы кабыл алгандан кийин документти бекитүү үчүн Сенатка жөнөттү.
Өзбек парламентинин төмөнкү палатасынын депутаты Козимжон Тожиев соттолгондорду алмашуу өзбек-кыргыз чек арасындагы «Достук» өткөрмө бекети аркылуу ишке ашарын тактады.
Документ соттолгондорду которууга кеткен чыгымдарды жабуу, талаш-тартыштарды чечүү механизми, тараптардын расмий баарлашуу тилдери жана башка маселелерди жөнгө салат. Макулдашууга ылайык, аны ишке ашырууга жооптуу борбордук органдар Өзбекстан менен Кыргызстандын Башкы прокуратуралары болуп саналат.
Эскерте кетсек, соттолгондорду өз өлкөсүндө жазасын улантууга өткөрүп берүү боюнча келишимге 2024-жылдын 18-июлунда Ташкентте Кыргызстандын президенти Садыр Жапаровдун иш сапарынын алкагында кол коюлган.
Буга чейин бул мыйзам долбоорун Жогорку Кеңеш үчүнчү окууда кабыл алган.
Алмашуу ишке ашкандан кийин эки өлкөнүн жарандары өз өлкөсүндө жазасын өтөй беришет.



















