Өзбекстан “Тынчтык кеңешин” түзүү боюнча тынчтык демилгесин колдоп, аны ийгиликтүү ишке ашырууга практикалык катышууга даяр. Республика Газа секторунда турак жайларды, бала бакчаларды, мектептерди жана ооруканаларды курууга өз салымын кошот.
Бул тууралуу Өзбекстандын президенти Шавкат Мирзиёев Вашингтон шаарында өткөн “Тынчтык кеңешинин” инаугурациялык жыйынында айтты.
Иш-чара АКШ президенти Дональд Трамп төрагалык кылуусу менен өттү. Жыйынга ошондой эле Азербайжан, Казакстан, Бахрейн, Индонезия, Аргентина, Парагвай, Румыния, Египет, Катар, Пакистан, Венгрия, Албания, Армения, Вьетнам, Камбоджа, Бириккен Араб Эмираттары, Түркия, Кувейт, Сауд Арабиясы, Израиль, Марокко жана башка мамлекеттердин делегация башчылары катышты.
Катышуучулар Газа секторун калыбына келтирүү, гуманитардык жардам көрсөтүү, ошондой эле аймакта тынчтык жана туруктуулукту камсыз кылуу маселелерин талкуулашты.
Өз сөзүндө Шавкат Мирзиёев АКШ президенти, Тынчтык кеңешинин төрагасы Дональд Трампка биринчи саммитти чакырганы үчүн ыраазычылык билдирди.
Ал Өзбекстан Тынчтык кеңешин түзүү боюнча тынчтык демилгесин колдоп, аны ийгиликтүү ишке ашырууга практикалык катышууга бекем ниетин билдиргенин белгиледи.
«Кеңештин иши Газа секторунун экономикалык жана социалдык калыбына келишине жагымдуу шарт түзөт деп ишенем», — деди мамлекет башчысы.
Ошол эле учурда ал Газага карата кандай гана тышкы башкаруу механизми болбосун, сөзсүз түрдө сектордун калкынын ички колдоосуна таянышы керектигин баса белгиледи.
Өзбекстандын президенти бардык тараптардын координацияланган аракеттери жаңжалдан кийинки процесстин туруктуулугун камсыз кылып, Газаны мүмкүн болушунча тезирээк калыбына келтирүүгө шарт түзөрүнө ишеним билдирди.
Өзбекстан Газа секторунда турак жайларды, бала бакчаларды, мектептерди жана ооруканаларды курууга өз салымын кошууга даяр экенин дагы бир жолу ырастады.
«Бул жолугушуу эл аралык тилектештиктин, тынчтык орнотуунун жана Жакынкы Чыгыштагы кырдаалды жакшыртууга болгон жалпы умтулуубуздун айкын далили болуп саналат. Биз бул тарыхый мүмкүнчүлүктү пайдаланып, экономикасы өнүккөн жана калкы үчүн татыктуу жашоо шарттары түзүлгөн Жаңы Газаны курууга тийишпиз», — деп белгиледи президент.
Жыйындын алкагында башка мамлекеттердин башчылары, өкмөт жетекчилери жана тышкы саясат мекемелеринин өкүлдөрү да сөз сүйлөштү.
Жыйындын жыйынтыгында “Тынчтык кеңешинин” ишмердүүлүгүн колдоо жөнүндө Декларацияга кол коюлду.



















