Улуу Британиянын Тышкы иштер министри Лорд Дэвид Кэмерон Кыргызстанга расмий иш сапары менен келди.
Жогорку даражалуу конокту «Манас» эл аралык аэропортунда Тышкы иштер министринин орун басары Айбек Молдогазиев жана Кыргызстандын Улуу Британиядагы Атайын жана Ыйгарым укуктуу Элчиси Улан Джусупов тосуп алды.

Сапардын алкагында Кыргызстандын Тышкы иштер министри Жээнбек Кулубаев менен эки тараптуу сүйлөшүүлөр, ошондой эле өлкө жетекчилиги менен жолугушуулар орун алат.

Лорд Дэвид Кэмерон мунун алдында Тажикстанда сапар менен болду. Аны Душанбе эл аралык аэропортунан тышкы иштер министринин биринчи орун басары Исматулло Насредин жана башка расмий адамдар тосуп алышкан.
Тажикстандын ТИМи буга чейин британ министрин Тажикстандын президенти Эмомали Рахмон кабыл алып, тышкы иштер министри Сироджиддин Мухриддин менен да жолугушуусу болорун маалымдаган. Тараптар эки өлкөнүн учурдагы абалын жана кызматташуу келечегин, ошондой эле аймактык маселелерди талкуулашары белгиленген.
Буга чейин The Independent гезити Дэвид Кэмерон беш күндүк сапарынын алкагында Борбор Азиянын бардык беш өлкөсүнө жана Монголияга барып, бул өлкөлөрдүн бийликтери менен жолугарын кабарлаган.



















