Улуу Британиянын өкмөтү ноябрдын аягынан тартып мыйзамсыз мигранттарды мейманканалардын ордуна аскердик объекттерге жайгаштыра баштайт. Бул тууралуу The Times гезити жазды.
Маалыматка караганда, мигранттардын алгачкы топтору Шотландиядагы Инвернесс шаарына жакын жайгашкан аскердик базанын барактарында, ошондой эле Англиянын түштүгүндөгү Чыгыш Сассекс графтыгындагы машыгуу лагеринде жайгаштырылат. Бул эки жайда болжол менен 900 адамды кабыл алуу пландалууда. Кийинчерээк Ички иштер министрлиги убактылуу негизде 10 миңге чейин мыйзамсыз мигранттарды жайгаштырууну көздөп жатат.
Өкмөттүн бул демилгеси бюджетке түшкөн жүктү азайтууга жана мигранттарды кымбат мейманканаларда жайгаштыруудан акырындык менен баш тартууга багытталган. Улуу Британиянын Ички иштер министрлигинин маалыматына ылайык, 2025-жылдын март айына карата өлкө боюнча 210 мейманканада 32 миңге жакын мыйзамсыз мигрант жашап жаткан. Парламенттин ички иштер боюнча комитетинин 27-октябрда жарыяланган баяндамасында 2019–2029-жылдар аралыгында өкмөт мейманканаларда мигранттарды жайгаштырууга 15,3 миллиард фунт стерлинг (20,4 миллиард доллар) коротору көрсөтүлгөн.
Бирок бул план айрым эксперттер арасында күмөн жаратты. The Times буга чейин Улуттук аудит кызматынын отчетуна шилтеме берип, аскердик базаларды жана лагерьлерди турак жайга айлантуу чыгымы учурдагы мейманканаларды ижарага алуудан да кымбатыраак болушу мүмкүн экенин жазган.
Сын-пикирлерге карабастан, Улуу Британиянын өкмөтү 2029-жылга чейин мигранттарды мейманканаларда жайгаштыруудан толук баш тартуу ниетин билдирди.


















