АКШнын президенти Дональд Трамп Казакстанга барышы мүмкүн экенин айтып, бул өлкөнүн президенти Касым-Жомарт Токаев менен “өтө жакшы сүйлөшүү” өткөргөнүн билдирди. Бул тууралуу ТАСС агенттиги жазды.
“Мен муну жасай алам”, – деди АКШ президенти Казакстанга барабы деген суроого жооп берип жатып.
Трамп Токаев менен өтө жакшы сүйлөшүү болгонун кошумчалады.
“Ага саламымды жеткиргиле. Ал жакшы адам”, – деди америкалык лидери Ак үйдүн Түштүк аянтында журналисттердин суроолоруна жооп берип жатып.
Буга чейин Казакстандын вице-премьер-министри жана улуттук экономика министри Серик Жумангарин ушул айдын башында АКШ менен соода-экономикалык байланыштарды өнүктүрүүнү республиканын тышкы саясатынын артыкчылыктуу багыты болуп саналарын билдирген. Ал АКШнын Соода палатасынын вице-президенти Хуш Чокси жана америкалык компаниялардын өкүлдөрү менен жолугушууда Астанада соода жүгүртүүнү көбөйтүүгө чоң потенциал бар деп эсептешерин билдирген.
1-августта Трамп 60тан ашык өлкө жана Евробиримдикке 15тен 41%га чейин бажы алымдарын киргизүү тууралуу жарлыкка кол койгон. Казакстан үчүн бажы алымы 25% деп белгиленген. Андан мурда Трамп Токаевге мындай чечимдин негиздерин түшүндүргөн кат жөнөткөн. Токаев жооп катында компромисске жетишүүгө ишенимин билдирген. Казакстандын соода министрлиги Вашингтондо кырдаалды жөнгө салуу боюнча сунуштарды берген. Министрликтин маалыматына ылайык, бажы алымдары республиканын АКШга экспорттогон товарларынын болжол менен 5%ына гана таасир этет.
















