Түркиянын президенти Режеп Тайып Эрдогандын администрациясынын дезинформация менен күрөшүү борбору мамлекет башчысынын “жүрөгү кармады” деген маалыматтарды төгүндөдү.
«Социалдык тармактарда президент Эрдоган жүрөгүнөн кармап, ооруканага жаткырылганы тууралуу маалыматтар чындыкка дал келбейт», — деп жазылган аталган борбордун Twitter баракчасында.
Эрдогандын саламаттыгы абдан жакшы, ал кичине тумоолоп калган деген вице-президент Фуат Октайдын сөзүн TRT Haber телеканалы келтирди.
Ошол эле убакта өлкөнүн башкаруучу “Акыйкат жана өнүгүү” партиясынын өкүлү Эркан Кандемир бүгүн бейшембиде өтө турган «Аккую» АЭСине өзөктүк отун жеткирүү иш-чарасына видеобайланыш аркылуу катышарын билдирди. Буга чейин Эрдоган өзү келип катышканы жатканы кабарланган. Мындан тышкары, бүгүнкүгө белгиленген митинг жылдырылган.
Кечээ, 26-апрелде түрк президенти дарыгерлердин кеңеши менен бир нече үгүт иш-чараларына катышпай калды. Ал бир күн мурун жергиликтүү телеканалдарга түз эфирде маек берген. Күтүүсүздөн Эрдоган өзүн жаман сезгендиктен, эфир бир аз убакытка токтотулган. Узак тыныгуу социалдык тармактарда тынчсыздануу жаратып, Эрдогандын жүрөгү кармап калганы тууралуу маалыматтар тараган. Бир топ тыныгуудан кийин эфи кайра жанданып, түрк лидери көрүүчүлөрдөн кечирим сурап, бир аз тумоолоп калганын билдирген. Мамлекет башчысы шайлоо өнөктүгүнө катышууну бейшемби күнү улантууну убада кылган.
Түркияда президенттик жана парламенттик шайлоо 14-майга белгиленген. Эрдогандын негизги атаандашы – “Республикалык альянстан” бирдиктүү талапкер – оппозициядагы “Элдик альянстын” талапкери Кемал Кылычдароглу болду. Ошондой эле шайлоого «Memleket» партиясынын лидери Мухаррем Инже жана «Ata» альянсынын талапкери Синан Оган да катышат.
