Словакиянын борбору Братиславадан тышкары дагы 15 шаарда өкмөттүн сунуштарына каршы, жеке киреше салыгын жогорулатуу, бюджеттик сектордун кызматкерлеринин айрым категорияларынын эмгек акысын “тоңдуруу” жана жеке ишкерлер тарабынан бюджетке төлөнүүчү социалдык чегерүүлөрдү көбөйтүүгө каршы ири митинг болуп өттү.
Бул тууралуу РИА новости жазды.
Оппозициялык “Прогрессивдүү Словакия” партиясы борбордо нааразылык акциясына 18 миң адам чыкканын билдирген.
“Митингге парламентке кирген дагы эки оппозициялык партия жана өлкөнүн мыйзам чыгаруу органында өкүлчүлүгү жок бир оппозициялык партия кошулду. Акция “Жакырланууга каршы!” деген ураандын астында өтүп жатат”,- деп жазат агенттик.
Маалыматта белгиленгендей, нааразылык акциялары Братиславада гана эмес, Словакиянын башка 15 шаарында да жарыяланды.
Митингдин катышуучулары Словакиянын өкмөттүк имаратынын алдындагы аянтты толугу менен толтуруп, алардын айрымдары өкмөткө каршы ураандар жазылган плакаттарды алып келишкен.
Сентябрда Словакиянын каржы министри Ладислав Каменицкий бюджетти консолидациялоо боюнча бир катар чараларды сунуштаган.
Каменицкийдин айтымында, эгерде республика аларды кабыл албаса, анда бюджеттин жогорку тартыштыгына, мамлекеттик карыздын көбөйүшүнө, эл аралык рейтингдердин начарлашына, ипотекалык ставкалардын көтөрүлүшүнө басым жасалып, социалдык кызматтарга жана саламаттыкты сактоого чыгымдардын кыскарышына дуушар болот.
Мындан тышкары Словакиянын каржы министри өлкөнүн бюджетине кошумча 2,7 миллиард евро тартууга тийиш болгон 20дан ашык чараларын сунуш кылып киргизген.
Министрликтер өздөрүнүн чыгашаларын кыскартуу жана артыкчылыктуу эмес сатып алуулардан баш тартуу боюнча чараларды көрөт деп болжолдонууда. Өкмөт ошондой эле мамлекеттик кызматкерлердин, полиция, аскер кызматындагылар жана өрт өчүрүүчүлөрдүн маянасын “тоңдурууну”, ошондой эле кирешеси жылына 44 миң евродон ашкан жеке адамдардын киреше салыгын жогорулатууну пландаштырууда.
Курамында кант жана туз көп болгон товарларга кошумча нарк салыгын жогорулатуу маселеси да талкууланууда. Бул таттуулардын, таттуу алкоголсуз суусундуктардын, чипсылардын жана башка азыктардын кымбатташына алып келери белгиленген.
Словакиянын оппозициясы өкмөт тарабынан бул сунуштарды кескин сынга алып, мындай чаралар карапайым жарандардын жана кичи ишкерлердин жашоосуна терс таасирин тийгизет деп эсептейт. Ошол эле учурда өлкөдөгү орточо көрсөткүчтөн жогору киреше тапкандарга бул салыктар дээрлик эч кандай таасир этпейт деп эсептешет.



















