Сириянын убактылуу президенти Ахмед аш-Шараа коопсуздук күчтөрү менен “мурдагы президенттин жактоочуларынын” ортосундагы акыркы кагылышуулардын жана карапайым калктын өлүмүнүн шартында, ири алавит жамааты жашаган жээктеги райондордун жашоочулары менен байланышуу үчүн жарандык тынчтыкты сактоо боюнча жогорку комитет түзүлгөнүн жарыялады.
Бул тууралуу Сириянын SANA маалымат агенттиги билдирди.
“Улуттук таламдарды жана Сирия элинин түрдүү өкүлдөрүнүн ортосундагы жарандык тынчтыкты орнотуу милдеттенмелерин эске алуу менен, Сирия Араб Республикасынын жетекчилиги Жарандык тынчтыкты сактоо боюнча Жогорку комитетти түзүү жөнүндө чечим кабыл алды”, – деп айтылат жарлыкта.
Комитеттин курамына Латакия жана Тартус провинцияларынын губернаторлору Хасан Суфан жана Анас Айрут башында турган үч киши кирди.
Алардын милдеттери болуп жээктеги шаарлардын калкы менен байланышты кармап туруу, алардан болуп жаткан окуялар жөнүндө маалымат алуу, Сириянын бул бөлүгүндөгү калкка колдоо көрсөтүү, ошондой эле аларды коргоону камсыз кылуу, ошондой эле “Ушул сезимтал учурда улуттук биримдикти чыңдоо үчүн иштөө” кирет.
Бейшембиде Сириянын Латакия жана Тартус провинцияларында Сириянын коопсуздук күчтөрү менен Дамасктын жаңы өкмөтүнө каршы куралдуу топтордун ортосунда айыгышкан кагылышуулар болду.
Сириядагы адам укуктарына байкоо салган бейөкмөт уюмунун (SOHR) акыркы маалыматтарына караганда, акыркы күндөрү Сириянын жээктеринде алавит жамаатынан 830 жайкын тургун набыт болду.
Коргоо министрлиги акыркы бир нече күндө жээктеги провинцияларда жаңы өкмөткө каршы куралдуу топтор менен кагылышууларда коопсуздук күчтөрүнүн кызматкерлери да каза болгон.
Ал эми Улуу Британияда жайгашкан Сириядагы Адам укуктары боюнча обсерваториясы (SOHR) Сириянын жаңы өкмөтүнүн коопсуздук күчтөрү менен бийликтен кулатылган президент Башар Асаддын жактоочуларынын ортосундагы эки күндүк кагылышууда кеминде 1018 адам, анын ичинде аялдар менен балдар да каза болгондугун билдирди.
Уюм билдиргендей, 6-8-март аралыгында Орусиянын куралдуу күчтөрүнүн аба жана деңиз базалары жайгашкан деңиз жээгиндеги Латакия жана Тартус шаарларында болгон кагылышууларда 745 жаран каза болду.
Курман болгондордун арасында 125 өкмөттүк коопсуздук күчтөрү жана SOHR “мурдагы режимдин козголоңчулары жана алардын колдоочулары” деп аталган куралдуу топтордун 148 согушкери да бар.
“Ишемби күнү кечинде курмандыктардын жалпы саны 1018ге жетти, анын ичинде 745 жайкын тургун жок кылынган жана диний кыргындар учурунда өлтүрүлгөн”, – деп айтылат билдирүүдө.
Ал эми сириялык укук коргоочулар Латакия, Тартус, Хама жана Хомс провинцияларындагы 29 шаарда карапайым калк кыргынга учураганын кабарлашууда.
Эки күндүк тополоңдон улам элди камсыз кылуу кыйындады. Тактап айтканда, Латакияда электр жарыгы жана суу менен камсыздоо үзгүлтүккө учурап, базарлар жана наабайканалар жабылганын маалымат агенттиктери кабарлашты.
Эскерте кетсек, өткөн жылдын сонунда Сириянын президенти Башар Асад бийликтен кулатылып, анын ордуна Ахмед аш-Шараа бийликке келген.















