Өзбекстандын президенти Шавкат Мирзиёев 13-16-январда шейх Мохаммед бин Заид Аль Нахайяндын чакыруусу менен Бириккен Араб Эмираттарына барат, деп билдирди өзбек лидеринин басма сөз кызматы.
Мирзиёев Абу-Дабиде Заид Аль Нахайян менен эки тараптуу сүйлөшүүлөрдү жүргүзүп, алдыңкы мамлекеттик уюмдардын, компаниялардын жана банктардын жетекчилери менен жолугушат, ошондой эле «Абу-Дабиде туруктуу өнүгүү жумалыгы» эл аралык саммитине катышат.
Дубайда ал БАЭнин премьер-министри жана Дубайдын эмири шейх Мохаммед бин Рашид Аль Мактум менен жолугушат.
Сапардын негизги темалары Өзбекстан-БАЭ мамилелерин тереңдетүү, инвестиция, жашыл энергетика, инфраструктура, санариптештирүү, жасалма интеллект, инновациялык өнүгүү жана туризм сыяктуу тармактарда кызматташууну кеңейтүү. Мындан тышкары эки өлкөнүн ортосундагы маданий-гуманитардык кызматташууга өзгөчө көңүл бурулат.
Ошондой эле эл аралык жана аймактык саясаттын актуалдуу маселелери талкууланат. Эки өлкөнүн ортосундагы кызматташтыкты өнүктүрүүгө багытталган бир катар келишимдерге кол коюлары күтүлүүдө.
Сүрөт: Өзбекстандын президентинин басма сөз кызматы.



















