Сенегалдын мурдагы президенти Маки Салл Бириккен Улуттар Уюмунун (БУУ) Баш катчысы кызматына талапкерлигин көрсөттү.
Жергиликтүү ЖМКлардын маалыматына ылайык, Саллдын талапкерлигин көрсөтүү тууралуу документ БУУнун Башкы Ассамблеясынын төрайымы Анналена Бербокко Бурундинин БУУдагы туруктуу өкүлү Зефирин Маниратанга тарабынан тапшырылган.
Маалыматта айтылгандай, Саллды учурда Африка союзуна (АС) төрагалык кылып жаткан Бурундинин президенти Эварист Ндайишимие сунуштаган.
Буга чейин ЖМКларда мурдагы сенегалдык лидердин талапкерлигин көрсөтүү маселеси февралда Аддис-Абебада өткөн Африка союзунун 39-кезектеги саммитинин алкагында талкууланганы кабарланган, бирок анда уюм расмий чечим кабыл алган эмес.
Ротация принцибине ылайык, африкалык талапкердин мүмкүнчүлүктөрү жогору эмес деп бааланууда.
Негизги атаандаштар катары Чили, Бразилия жана Мексика колдогон Чилинин мурдагы президенти Мишель Бачелет, ошондой эле 2019-жылдын декабрынан бери кызматта турган жана Аргентина тарабынан көрсөтүлгөн Эл аралык атом энергиясы агенттигинин (МАГАТЭ) башкы директору Рафаэль Мариано Гросси аталууда.
Учурдагы БУУнун Баш катчысы, португалиялык Антониу Гутерриштин ыйгарым укуктары 2026-жылдын аягында аяктайт. Анын ордун ээлөө үчүн Салл адегенде БУУнун Коопсуздук Кеңешинин колдоосун алышы керек.
Коопсуздук Кеңеши чечимди 15 мүчөнүн кеминде тогузу колдогон учурда жана туруктуу беш мүчөнүн бири да вето койбогон шартта кабыл алат.
Бул этаптан өткөндөн кийин талапкердин талапкерлиги Башкы Ассамблеяда кол чабуулар менен бекитилет.
Маки Салл Сенегалдын президенти кызматын 2012-жылдан 2024-жылга чейин аркалаган. Анын атаандашы Бассиру Диомай Файе мамлекет башчысы болуп шайлангандан кийин, Салл өлкөдөн чыгып, Мароккого көчүп кеткен.

















