Сауд Аравиянын Тышкы иштер министрлиги билдирүү жасап, Израилдин Газа тилкесинде жасаган кылмыштарынын уланышын айыптады.
Сауд Аравия ТИМинин билдирүүсүндө, эл аралык коомчулуктун Израилдин кылмыштары менен күрөшүү үчүн жазалоочу каражаттарды колдоно албагандыгы жана жөндөмсүздүгү дагы көп кылмыштарды жасоого жана Палестина элинин азап-кайгысынын көбөйүшүнө жана андан ары кыйроолорго алып келип жатканы айтылат.
Ведомство дагы бир жолу эл аралык коомчулукту Израилдин Газа тилкесиндеги кылмыштарын токтотуу жана бул режимди жасаган кылмыштары үчүн жазалоо милдетин аткарууга чакырды.
Бул айыптоо Палестинанын бийликтери ушул аптада Израиль аскерлери таштап кеткен Хан Юнистеги “Насер” ооруканасынын айланасында жүздөгөн адамдардын сөөгү табылганын кабарлагандан кийин жасалды.
Массалык көрүстөн Израилдин армиясы Газанын түштүгүндөгү Хан Юнис шаарында төрт ай операция жүргүзүп чыгып кеткенден кийин өткөн ишембиде табылган.
Human Rights Watch эл аралык укук коргоо уюму Газа тилкесинде израилдик аскерлер тарабынан жасалган 140тан ашуун массалык көрүстөндөр аныкталганын билдирген.
Уюмдун баяндамасында Израиль аскерлери талаада өлүм жазасына тартылган палестиналыктарды бул мүрзөлөргө массалык түрдө көмүшкөнү айтылат.
Буга чейин палестиналык ЖМКлар Хан Юнистеги “Насер” ооруканасынын аймагында табылган массалык көрүстөндөрдөн чыгарылган сөөктөрдүн саны 310го жеткенин маалымдашкан. Бул маалымат каражаттары палестин бийликтерине шилтеме жасап, бул мүрзөлөрдө дагы жүздөгөн дайынсыз жоголгон адамдардын сөөгү чыгышы мүмкүн экенин билдиришүүдө.
22-апрелде БУУнун адам укуктары боюнча Жогорку комиссарлыгынын басма сөз катчысы Равина Шамдасани массалык көрүстөндө көмүлгөндөрдүн арасында улгайган адамдар жана аялдар да бар экенин, алардын айрымдарынын колу байланган жана кийимсиз табылганын билдирген.


















