Президент Садыр Жапаровдун 18-19-апрелде Астана шаарына болгон расмий сапары аяктаганын анын маалымат кызматы билдирди.
Сапардын биринчи күнүндө мамлекет башчылары Астана шаарында эки өлкөнүн искусство чеберлеринин концертине катышышты.
19-апрелде, Садыр Жапаров менен Касым-Жомарт Токаев тар жана кеңейтилген курамдардагы сүйлөшүүлөрдү өткөрүп, анда соода-экономикалык, суу-энергетикалык, транспорттук-чек ара жана маданий-гуманитардык тармактарда кыргыз-казак кызматташтыгын тереңдетүүнүн артыкчылыктуу маселелери талкууланды.

Эки тарап тең союздук мамилелердин жана стратегиялык өнөктөштүктүн духунда бардык багыттар боюнча кызматташтыкты өнүктүрүүгө умтуларын тастыкташты.
Тар курамдагы жолугушуудан кийин президенттер Кыргызстан жана Казакстандын Жогорку мамлекеттер аралык кеңешинин алтынчы жыйынын өткөрүштү.

Сүйлөшүүлөрдүн жыйынтыгы боюнча эки тараптуу өз ара аракеттенүүнүн кеңири спектри боюнча кызматташууну тереңдетүүгө багытталган бир катар документтерге кол коюлду.

Кол коюлган документтер:
- Союздук мамилелерди тереңдетүү жана кеңейтүү келишими;
- Мамлекеттер аралык Кеңештин чечими;
- 2003-жылдын 25-декабрында кол коюлган Мамлекеттик чек ара аркылуу өткөрүү пункттары жөнүндө өкмөттөр аралык макулдашууга өзгөртүүлөрдү киргизүү тууралуу Протокол;
- Кыргызстандын Министрлер Кабинети менен Казакстандын Өкмөтүнүн ортосундагы Инвестицияларды колдоо жана өз ара коргоо жөнүндө макулдашуу;
- Кыргыз-казак мамлекеттик чек арасында Автоунаа өткөрүү пункттарын өнүктүрүү боюнча биргелешкен иш-чаралар планы (Жол картасы) ;
- КРдин Министрлер Кабинетине караштуу Жеке маалыматтарды коргоо боюнча мамлекеттик агенттиги тарабынан Казакстан Республикасынын Санариптик өнүктүрүү, инновациялар жана аэрокосмостук өнөр жай министрлиги ортосунда өз ара түшүнүшүү жөнүндө Меморандум;
- КРдин Министрлер Кабинетине караштуу Архитектура, курулуш жана турак жай-коммуналдык чарба мамлекеттик агенттиги менен Казакстан Республикасынын Өнөр жай жана курулуш министрлигинин ортосундагы өз ара түшүнүшүү жана кызматташуу жөнүндө Меморандум.
Расмий сапардын алкагында Казакстандын президенти Касым-Жомарт Токаев президент Садыр Жапаровго І даражадагы «Достык» орденин тапшырды.
Казакстандын президенти Садыр Жапаровдун эки элдин боордоштугун бекемдөөдөгү ролун жогору баалап, Казакстан Кыргызстан менен стратегиялык өнөктөштүктү жана союздаштыкты кеңейтүүгө кызыкдар экенин кошумчалады.
Жапаров Казакстанга расмий сапарынын алкагында Айкөл Манастын айкелинин ачылыш аземине катышты.
Мамлекет башчысы бул күн кыргыз эли үчүн өзгөчө күн экенин айтып, казак окумуштуусу Чокан Валиханов талаа “Илиадасы” деп атаган “Манас” эпосун сактоого жана изилдөөгө Казакстан элинин кошкон салымын таануунун маанилүүлүгүн баса белгиледи.
Президент өз сөзүндө эки өлкө ортосундагы мамилелерде жаңы доор башталаарына ишенимин билдирди.
Өлкө башчысы ошондой эле Казакстандын космостук ишмердиги чөйрөсүндө тармактар аралык программаларды иштеп чыгуу жана ишке ашыруу менен алектенген “Казакстан Гарыш сапары” Улуттук компаниясына барды.
Расмий сапарын аяктап, президент Садыр Жапаров 19-апрелде Бишкек шаарына кайтып келди.































