Президент Садыр Жапаров бүгүн, 10-ноябрда, иш сапары менен Эр-Рияд шаарына (Сауд Аравия Королдугу) келди.
Мамлекет башчысынын борту Эр-Рияд шаарынын Король Халид атындагы эл аралык аэропортуна конду.
Учактан түшө беришинде килем төшөлүп, Ардак кароолдун ротасы тизилди.
Президент Садыр Жапаровду Эр-Рияд провинциясынын губернаторунун орун басары Мухаммад бин Абдурахман аль Сауд жана башка расмий адамдар тосуп алды.
Иш сапарынын алкагында президент Садыр Жапаров Ислам Кызматташтык Уюмуна мүчө мамлекеттердин кезексиз Ислам саммитине катышат, анын жүрүшүндө Палестина жана түштүк Ливан, ошондой эле жалпы эле Жакынкы Чыгыш аймагындагы учурдагы кырдаалды талкуулоо пландаштырылууда.
Мамлекет башчысын бул сапарда Тышкы иштер министри Жээнбек Кулубаев, президенттин Администрациясынын тышкы саясат бөлүмүнүн башчысы Муратбек Азымбакиев, Кыргызстандын Сауд Аравия Королдугундагы Атайын жана Ыйгарым Укуктуу Элчиси / Ислам Кызматташтык Уюмундагы Кыргызстандын Туруктуу өкүлү Улукбек Марипов коштоп барды.


















