Кыргыз Республикасынын Президенти Садыр Жапаров Болу провинциясындагы мейманканада чыккан өрттүн кесепетинен адамдар курман болгондугуна байланыштуу Түркия Республикасынын Президенти Режеп Тайып Эрдоганга көңүл айтуу телеграммасын жөнөттү. Бул тууралуу мамлекет башчынын маалымат кызматы билдирди.
“Түркия Республикасынын Болу провинциясындагы мейманканада чыккан өрттүн кесепетинен адамдар каза болду деген суук кабарды кайгыруу менен кабыл алдым.
Кыргыз Республикасынын элинин жана жеке өзүмдүн атымдан каза болгондордун үй-бүлөлөрүнө жана жакындарына аза кайгысын тең бөлүшүп көңүл айтам, ал эми жабыр тарткандардын тез арада сакайып кетишин каалайм”, – деп айтылат Мамлекет башчысынын телеграммасында.
Белгилей кетүүчү жагдай, 21-январда Түркиянын Болу провинциясындагы “Карталкая” лыжа базасындагы мейманканадан өрт чыккан.
Түркиянын ички иштер министри Али Ерликаянын акыркы маалыматы боюнча, каргашада каза болгондордун саны 76га жетти. Ал эми 45 сөөктүн тек-жайы аныкталган. 50дөн ашуун кишинин абалы оор болууда.
Тилсиз жоо 237 адам жашаган, жыгачтан курулган 12 кабаттуу мейманкананын ресторанында башталган. Кеминде эки киши терезеден секирип каза болгон. Айрымдары бөлмөлөрүнөн шейшеп жамынып качып чыгууга аракет кылышкан. Тилсиз жоонун келип чыккан себептери азырынча белгисиз. Түрк өкмөтү иликтөө жүргүзүү үчүн алты прокурорду дайындаганын кабарлады. Окуя болгон жерге ондогон өрт өчүрүүчү жана 38 “Тез жардам” кызматы жөнөтүлгөн.
Мейманкана тоо боорунда жайгашкандыктан куткаруу иштери кыйын болду. Өрт 10 сааттан кийин гана өчүрүлгөнү маалымдалды. Кыргызстандын Тышкы иштер министрлиги “Карталкаядагы” өрттөн жабыркагандардын арасында кыргыз жарандары жоктугун билдирди.


















