Мындай көрүнүш март айынын аягында Москва облусунун Красногорск шаарындагы «Крокус Сити Холл» концерттик залындагы террордук актыдан жана бул кайгылуу окуяга байланыштуу Россиядагы антимигранттык кампаниядан кийин башталды.
Өзбекстандык мигранттын айтуусунда, бир эле Москвада полициянын улам-улам текшерүүсүнөн улам мигранттар иштетип келген 75% кафелер жабылган.
Полиция акыркы айда сырттан келгендерди, айрыкча Борбор Азия өлкөлөрүнөн баргандарды текшерүүнү кескин күчөттү. Көпчүлүк мигранттар мындай катаал мамиледен улам Россиядан кетип жатышат же коомдук жайларга, анын ичинде кафе, ресторандарга баруудан баш тартышууда. Андыктан кафе, ресторандардын ээлери зыян тартышып, көпчүлүгү жумушун токтотууга мажбур болушту. Өзгөчө мигранттар тамактануу үчүн барышкан кафе, ресторандарды полиция катаал текшерүүгө алып, бул тармактагы бизнеске кедергисин тийгизип жатат.
«Азыр көпчүлүк ресторандар жана кафелер жабылды, себеби полиция улам көп келип, текшерүүнү күчөттү. Башка шаарларда кандай экендигин билбеймин, бирок Москвада чоң жана кичине кафелердин 75%ы жабылды», – деди Москвада жашаган Өзбекстандан барган Сардор аттуу мигрант.
Сардордун да Москвада кафеси бар эле жана терактан кийин ишин токтотууга мажбур болгон. Ал негизги кардарлары – Борбор Азия өлкөлөрүнөн баргандар экендигин айтты. Терактан кийин келгиндерге кысым бир топ күч алып, анын тамактануучу жайында кардарлар бир нече эсе азайып кеткен.


















