«Росатом» мамлекеттик корпорациясы жана «Казакстандын атомдук электр станциялары» ЖЧКсы Казакстанда «Балхаш» АЭСин куруу боюнча EPC-келишимине кол коюшту. Станция жалпы кубаттуулугу 2400 МВт болгон эки энергоблоктон турат.
АЭС Алматы облусунун Жамбыл районундагы Үлкөн айылынын жанында курулат. «Росатом» эл аралык консорциумду жетектеп, долбоорду ишке ашыруунун толук циклине — долбоорлоодон жана жабдууларды сатып алуудан тартып, курулушка, ишке киргизүүгө жана объектти заказчыга өткөрүп берүүгө чейин — жооп берет.
Станцияда ар биринин кубаттуулугу 1200 МВт болгон III+ муундагы ВВЭР-1200 реакторлорун орнотуу пландалууда. «Росатомдун» маалыматына ылайык, мындай реакторлордун кызмат өтөө мөөнөтү 60 жылды түзөт жана аны дагы 20 жылга узартууга мүмкүнчүлүк бар.
Келечектеги АЭСтин аймагында 2025-жылдын августунда башталган изилдөө иштери уланууда. Адистер тереңдиги 120 метрге чейин жеткен 60тан ашык скважина бургулатып, энергоблокторду жайгаштыруу үчүн оптималдуу жерди тандоо максатында алынган үлгүлөрдү изилдеп жатышат.
Изилдөө иштерин 2027-жылы аяктоо пландалууда. Андан кийин адистер энергоблокторду курууга уруксат алуу үчүн зарыл болгон документтерди даярдоого киришет.
«Росатомдун» жетекчиси Алексей Лихачёв келишимге кол коюуну Казакстан менен кызматташтыктын жаңы этабы деп атады. Анын айтымында, кийинки кадам долбоорлоо иштерин жүргүзүү жана жабдууларды жеткирүүчү компаниялардан турган эл аралык консорциум түзүү болот.
«Росатом» 2025-жылдын июнь айында Казакстандагы кубаттуулугу чоң биринчи АЭСти куруу боюнча эл аралык консорциумдун лидери деп таанылган. Ошол эле айда тараптар долбоордун жол картасын бекитишкен. Анда инженердик-изилдөө иштерин жүргүзүү, долбоордук документтерди даярдоо жана EPC-келишимин түзүү каралган. EPC-келишими — долбоорлоо, жабдууларды сатып алуу жана куруу боюнча келишим.
2026-жылдын май айында Орусия менен Казакстандын өкмөттөрү Казакстандын аймагында атомдук электр станциясын куруу боюнча кызматташтыктын негизги принциптери жана шарттары жөнүндө келишим түзүшкөн. Документте долбоордун негизги параметрлери, ошондой эле мындан аркы кызматташтыктын багыттары, анын ичинде станцияны тейлөө жана отун жеткирүү маселелери аныкталган.
Сүрөт: «Росатом»



















