Израиль менен Ливандагы “Хезболла” тобунун ортосундагы жаңжалдын фонунда Парижде өткөн эл аралык конференцияда Ливанга чукул жардам көрсөтүү үчүн 1 миллиард еврого жакын акча чогултулду.
Франциянын тышкы иштер министри Жан-Ноэль Барро 24-октябрда 800 миллион евро калкка гуманитардык жардам көрсөтүүгө, 200 миллион евро Ливандын куралдуу күчтөрүн чыңдоого жумшаларын тактады.
Иш-чарага 70ке жакын мамлекеттин жана эл аралык уюмдардын өкүлдөрү катышты. Германия 96 миллион евро, Франция 100 миллион евро бөлөт.
«Ливандын армиясы чоң колдоого муктаж. Эгер биз өлкөнүн чек араларын жана эгемендигин коргой алышын кааласак, аскерлер жакшыраак даярдалып, жакшы жабдылышы керек”, – деди Евробиримдиктин тышкы иштер боюнча жогорку өкүлү Жозеп Боррел.
Буга чейин дүйнөлүк ММКлар “Хезболла” тобу Израиль менен согуштун жаңы этабына өткөнүн жарыялаганын жазган.


















