Өлкө ичинде жана башка өлкөлөрдө жер которгон палестиналыктардын саны 7 миллиондон ашат.
Бул тууралуу Палестинанын президенти Махмуд Аббас “Ан-Накба” (“Кырсык күнү”) — Биринчи араб-израилдик согушта араб тараптын жеңилгендигин эскерүү күнүнө карата сүйлөгөн сөзүндө билдирди.
“Израилдин оккупациялык күчтөрү акыркы 19 айдан бери бүт дүйнөнүн көз алдында жасап жаткан иштери – бул геноцид, кыйроо жана биздин элибизди Газа тилкесинен сүрүп чыгаруу үчүн ачкачылыкты курал катары колдонуу. Мындан тышкары, Иордан дарыясынын батыш жээгинде жана Чыгыш Иерусалимде Палестина мамлекетинин аймактарын кылмыштуу уурдап алуу аракеттери да уланып жатат”, – деген президенттин сөзүнүн Палестинанын WAFA маалымат агенттиги келтирет.
Анын айтымында, Палестинанын ичинде, коңшу өлкөлөрдө жана дүйнө жүзү боюнча палестиналык качкындардын саны 7 миллиондон ашты.
“Алардын азап-кайгылары өзгөчө Газада, Батыш жээкте, анын ичинде Чыгыш Иерусалим, Иордания, Ливан жана Сириядагы качкындар лагерлеринде уланууда”, – деди Аббас.
Израиль-Палестина жаңжалы
2023-жылдын 7-октябрынан бери уланган Палестина-Израиль жаңжалы Жакынкы Чыгыштагы эң чоң гуманитардык кризистердин бири болуп калды. Газада миңдеген адамдардын өмүрү кыйылып, миллиондогон жарандар үй-жайсыз калды. Согуштун кесепетинен жарандык жана экономикалык инфраструктура чоң зыянга учурады, бул аймактагы кырдаалды дагы да курчутуп жатат.
Газанын Саламаттык сактоо министрлигинин акыркы маалыматы боюнча Израилдин Газа тилкесинде аскердик операциясы башталгандан бери анклавда 53 010 киши каза болду, алардын көбү жай тургундар. Ал эми жарадар болгондордун жалпы саны 119 998 адамды түзөт.
Жаңжалдын дагы бир олуттуу кесепети – гуманитардык кризис. Миллиондогон адамдар азык-түлүк, таза суу жана медициналык жардамга муктаж. Энергия жана таза суу жетишсиздиги, үйлөрдүн бузулушу, санитардык шарттардын начардыгы кырдаалды ого бетер курчутууда. БУУнун эсебинде, аймактагы балдардын 60%ы психологиялык жардамга муктаж.
Дүйнөлүк коомчулук жаңжалды токтотууга аракет кылып жатканына карабастан, согуш уланууда.
Палестина-Израиль жаңжалы азыркы замандын эң оор гуманитардык кризистеринин бири болуп калууда. Согушту токтотуу жана тынчтыкты орнотуу аракеттери күчөтүлүшү керек, антпесе аймактагы гуманитардык кырдаал мындан да начарлап кетүү коркунучу бар. Мунун баары дүйнө коомчулугунун колдоосун жана чечкиндүү чараларын талап кылат.
