Көзөмөл-кассалык аппаратын милдеттүү түрдө колдонууга каршы митингдер бир эле Бишкекте эмес Ош, Талас жана Каракол шаарларында да өттү. Бул тууралуу бир катар ЖМКлар жазды.
Маалым болгондой, жергиликтүү базарлардын соодагерлери бийликтен патент менен иштөөгө уруксат берүүнү суранышууда.
ККМге каршы митинг 29-ноябрда Ош облусунун Кара-Суу базарында өткөн. Соодагерлер салык саясатына нааразы болуп, жыл жаңырганда ишке кире турган Көзөмөл-кассалык аппаратын иштетүүгө жана электрондук эсеп-фактурасын толтурууга каршы экендиктерин айтышкан. Алар салык төлөөнүн патент системасын калтырууну талап кылышкан. Ушундай эле талаптар менен 30-ноябрда Бишкектеги “Дордой”, “Орто-Сай” жана “Мадина” базарындагы соодагерлер чыгышкан.
Алардын нааразычылык акциясынан кийин Мамлекеттик Салык кызматы маалымат таратып, Бишкектеги «Дордой» жана Оштогу «Тураталы» базарларында иштеген соодагерлер көзөмөл-кассалык машиналарды колдонуудан бошотула турганын жарыялады. ККМ колдонууга каршы чыккан ишкерлерге түшүндүрүү иштери жүргүзүлүп, алар соодасын улантышкан.
Ал эми бүгүн болсо борбор калаадагы “Аламүдүн” базарында иштеген соодагерлер 1-январдан тарта жокко чыга турган патенттик системаны калтырууну талап кылып чыгышты.


















