Бүгүн, 20-августта, Ош шаарында Казакстандын Башкы консулдугунун расмий ачылыш аземи болуп өттү.
Президенттин Ош облусундагы ыйгарым укуктуу өкүлүнүн маалымат кызматы маалымдагандай, иш-чара Казакстандын Конституция күнүнө карата уюштурулду.
Ачылышка президенттин Ош облусундагы ыйгарым укуктуу өкүлү Эльчибек Джантаев, Ош шаарынын мэри Жеңишбек Токторбаев, КР Тышкы иштер министринин биринчи орун басары Асеин Исаев, Казакстан Республикасынын тышкы иштер министринин орун басары Ермухамед Конуспаев жана шаардагы башка консулдук өкүлдөрү катышты.
Өз сөзүндө Эльчибек Джантаев Казакстандын Башкы консулдугунун Ошто ачылышын кубануу менен белгилеп, бул кадам эки өлкө ортосундагы достук жана кызматташтык мамилелерин чыңдоого чоң салым кошорун айтты.
Жаңы ачылган консулдук Казакстан менен экономикалык жана маданий-гуманитардык кызматташууну өнүктүрүү, ошондой эле Кыргызстандагы казак жарандарына ар тараптуу жардам көрсөтүү максатында иш алып барат.
Башкы консулдук Ош шаарынын Резиденция кичи районунда, 6-көчө, 18-үйдө жайгашкан.
Белгилей кетсек, Казакстандын президенти Касым-Жомарт Токаев 21-августта Кыргызстанга расмий сапар менен келет.
Сапардын жүрүшүндө эки өлкөнүн лидерлеринин катышуусунда Ынтымак паркында «Достуктун алтын көпүрөсү» монументинин расмий ачылыш аземин өткөрүү, Л.Н. Гумилев атындагы Евразия улуттук университетинин Ош шаарындагы филиалынын ачылышы, ошондой эле Кыргызстанда казак киносунун күндөрүн жана Бишкек шаарында үчүнчү Кыргыз-Казак жаштар форумун өткөрүү пландаштырылган.
