Бүгүн Ош облусунда “Билим берүүнүн санарип платформасы жана жашыл көндүмдөр”, – деген темадагы мугалимдердин Август педагогикалык Кеңешмеси өттү.
Ага КР Президентинин облустагы ыйгарм укуктуу өкүлчүлүгү, райондук билим берүү башкармалыктарынын башчылары жана облустагы мугалимдер катышты.
Август кеңешменин жүрүшүндө билим берүүнүн мыктыларына “Эмгек сиңирген мугалим”, “Билим берүүнүн мыктысы” наамдары тапшырылды. Ал эми ардагер мугалимдерге “Ош облусунун ардактуу атуулу” наамы, алдыңкы агартуучуларга Президенттин Ош облусундагы өкүлчүлүгүнүн ардак грамоталары ыйгарылды.
Облус жетекчиси мугалим – адамзаттын турмушундагы эң маанилүү адам экенине токтолуп, өзүнүн иши аркылуу көптөгөн муундардын дүйнө таанымынын негиздерин түзүп, аларга акылмандыктын жана адилеттүүлүктүн үлгүсү болуп келишкенин белгиледи.
“Сиздердин өтөгөн эмгек урмат-сыйга татыктуу. Жаш муунду тарбиялоодо, алардын ийгиликтерге жетүүсүндө, таалим-тарбия берүүдө мыкты аракеттерди көрүп келесиздер. Келечектеги жаратмандарды, демилгечилерди, өндүрүшчүлөрдү, белгилүү саясатчыларды, ишкерлерди, куруучуларды, спортчуларды жана илим менен маданият ишмерлерин, башка кесиптердин өкүлдөрүн тарбиялоодо, ошондой эле жалпы адамзаттын руханий баалуулуктарын, улуттук нарк насилди жаш муундардын кан-жанына сиңирип, адамзаттын басып өткөн жолун, жетишкендиктерин жана келечектеги мүмкүнчүлүктɵрүн окутуп үйрөтүүдө сиздердин салымыңыздар абдан чоң”,-деди облус жетекчиси Э.Джантаев.
Ошондой эле Ош облусунун эң жогорку сыйлыгы болгон “Ош облусунун Ардактуу атуулу” наамы жана “Даанышман” медалы менен 5 инсан сыйланды.
Кошумчалай кетсек, быйыл Ош облусу боюнча жалпы республикалык тестирлөөгө жалпысынан 6627 бүтүрүүчү катышып, 1 окуучу «Алтын сертификатка», 20 окуучу “Алтын тамга” артыкчылык аттестатына, 3 окуучу республикалык предметтик олимпиадада алдыңкы жана байгелүү орундарды багынткан.
