Бүгүн Ош шаарынын мэринин биринчи орун басары Марс Исаев калаада сатылып жаткан көмүрдүн баасына мониторинг жүргүздү.
Буга чейин, т.а. 25-октябрдан тарта, ата мекендик көмүрдүн бирдиктүү баасы (90 календардык күнгө) белгиленген. Ага ылыйык, кара отундун баасы тоннасына 6 500 сомдон, чекене баасы 1 килограммга 7 сомдон ашпоо керек.
Монополияга каршы жөнгө салуу кызматы тарабынан мыйзам бузуулар аныкталган учурда, колдонуудагы мыйзамдардын алкагында тиешелүү чаралар көрүлөт. Ошол эле учурда түшүндүрүү иштери менен көмүрдүн баасына мониторинг жүргүзүү, белгиленген бааларды колдонуу боюнча көзөмөл улантылат. Азыркы тапта Ош шаарында көмүргө болгон баа туруктуу.

Быйыл Ош шаарындагы билим берүү мекемелери менен шаардык оорукана көмүр менен толук камсыз кылуу катуу көзөмөлгө алынат. Ал эми абанын температурасы 3 күн катары менен 8 градустан төмөн болсо, жылуулук бериле баштайт.
Ошондой эле Ош облусунда да кышка даярдык аягына чыгып калды. Быйыл облустун бардык айыл өкмөттөрдө ондон көмүр сатуучу пункттар ачыла турган болууда. Ал эми быйылкы сезондо электр энергиясын үзгүлтүксүз берүүгө камылгалар азыртадан жүрүп жатат.
Белгилей кетсек, Ош облусунда жыл сайын социалдык жана жеке жактарга биригип, 225 миң тоннадан ашык көмүр керектелет.



















