Түркмөнстан орусиялык сатып алуучулардын төлөө жөндөмдүүлүгүнүн төмөндөшүнөн улам күнөскана жашылчаларын, өзгөчө помидорду сатууда чоң көйгөйлөрдү башынан кечирүүдө. Бул тууралуу 18-декабрда EastFruit билдирди.
Бүгүнкү күндө Түркмөнстандагы күнөскана чарбаларынын ээлери продукциясын килограммын 1 доллардан сатууда көйгөйлөр бар экенин айтышууда. Чыныгы баалар бул психологиялык босогодон төмөн. Алар Орусиянын рыногунда продукциясына суроо-талаптын кескин төмөндөп кеткенине нааразы болушууда,
Өзбекстандан келген помидордо да абал ушундай. Бул өлкөнүн экспортчулары рублдин девальвациясы жана Орусиянын каржы рыногундагы жалпы туруксуздук бул өлкөгө күнөскана продукциясын экспорттоо мүмкүнчүлүктөрүн начарлатып жатканын айтышат, деп белгилейт басылма.
2023-жылдын декабрында EastFruit белгилегендей, акыркы беш жылда Түркмөнстан күнөскана помидорлорун чет өлкөгө экспорттоону 20 эседен ашык көбөйткөн. Эгерде 2017-жылы экспорттун көлөмү 4800 тонна болсо, 2022-жылга чейин 104 миң тоннага чейин өскөн.
Андан соң жалпы жеткирүүнүн 99%ын түзгөн түркмөн помидорунун негизги импорттоочулары Казакстан, Кыргызстан жана Орусия экени айтылды. Басылманын талдоочулары экспорттун мындай төмөн диверсификациясы Түркмөнстанды үч гана өлкөнүн базар конъюнктурасына көз каранды кылып, экспорттун мындан аркы өсүшү басаңдашы мүмкүн деп эсептешет.



















