Ооганстандын чыгышындагы Нангархар провинциясында 16-июлда болгон селден кеминде 40 киши набыт болуп, дагы 347си жараат алды. Бул тууралуу Талибан өкмөтүнүн Саламаттыкты сактоо министрлигинин өкүлү Шарафат Заман Амар билдирди.
Анын айтымында, жабыркагандардын баары ооруканага жаткырылды. Аларга керектүү медициналык жардам көрсөтүлүп, гуманитардык жардамдарды жеткирүү эл аралык уюмдар менен макулдашылууда.
Ооган басылмаларынын маалыматына караганда, провинциядагы сел катуу жааган жамгырдан улам болгон.
Белгиленгендей, 400дөй үй талкаланып, 60 электр мамылары кулаган. Келтирилген зыянды аныктоо иштери уланууда.
Save the Children уюму бороон-чапкын Торхамдагы качкындарды кабыл алуу борборун талкалагандыгын, ал 2023-жылдын сентябрынан бери кайтып келген 650,000дей оогандыктарга колдоо көрсөтүү үчүн курулганын билдирди.


















