Ооганстандын түндүгүндөгү Жаузжан провинциясында Куш-Тепа мелиорациялык комплексинин курулушу аяктоо алдында турат. Бул тууралуу Ооганстан Ислам Эмиратынын расмий ресурсу Alemarah билдирди.
Курулуштун жүрүшүн мамлекеттик сатып алуулар боюнча өкүлү Ахмад Жан Билал жана подрядчы компаниянын жетекчиси Абдул Рахман Атташ текшерди. Алар Аму-Дарыядан суу алууга мумкундук бере турган каналды жана дамбаны карап чыгышты. Билалдын айтымында, бул Ооганстандын суу ресурстарын башкаруу жана айыл чарбасын модернизациялоо боюнча эң маанилүү стратегиялык долбоорлорунун бири. Ал Улуттук өнүктүрүү компаниясынын жетекчилигин жогору баалап, бул жаатта жетишилген ийгиликтер күтүлгөндөн да ашып кеткенин белгиледи.
Атташе коомчулукту афган инженерлери бардык талап кылынган стандарттарга ылайык долбоорду тез арада бүтүрөөрүнө ишендирди. Экинчи фазадагы жер жумуштары 85%, дамбанын курулушу 74%, каналдын боюндагы жети көпүрөнүн курулушу да тездик менен жүрүп жатат.
Долбоорго ылайык, каналдын узундугу 285 чакырымды, туурасы 100 метрди түзөт, Куш-Тепа үч облустун жерлерин сугарууга мүмкүндүк берет, ал эми кургакчыл аймактарда буудай жана жүгөрү өстүрүлө баштайт. Натыйжада Ооганстанда азык-түлүк маселеси азайып, чейрек миллион адам жумуш менен камсыз болот.
EADaily маалымдагандай, каналдын 108 км. узундуктагы биринчи бөлүгү 2024-жылдын октябрынын орто ченинде пайдаланууга берилген. Объекттин курулушуна 6,5 миң адам тартылган; Ишти аяктоонун акыркы мөөнөтү 2028-жылга белгиленген. Курулуштун баасы 600 миллион долларга бааланган.
«Известия» басылмасынын эксперттеринин пикиринде, бул долбоор Борбор Азиядагы суу көйгөйүн курчутат. Канал аркылуу жылына 10 куб км. суу чыгарылат, бул Аму-Дарыянын жылдык агымынын төрттөн бир бөлүгүнө барабар. Ансыз да кургакчылык менен күрөшүп жаткан ылдыйкы агымдагы Түркмөнстан менен Өзбекстан каналдын ачылышынан олуттуу жабыркашы мүмкүн.



















