Израилдин премьер-министри Биньямин Нетаньяху ХАМАСтын чабуулдарына жооп иретинде Израилдин Газа тилкесиндеги аракеттери “башталышы гана” деп билдирди.
“Биз душмандарыбыз жасаган мыкаачылыкты эч качан унутпайбыз… жана эч качан кечирбейбиз. Биз эч качан дүйнөгө же ким болбосун жөөт элине каршы ондогон жылдар бою жасалбаган мындай мыкаачылыкты унутуусуна жол бербейбиз. Биз душмандарыбызга болуп көрбөгөндөй күч менен сокку урабыз… Мен баса белгилейм: бул башталышы гана”, – деп жазган Times of Israel Нетаньяхунун сөзүн.
Ал ХАМАСты “жок кылуу” жана аны жеңүү үчүн убакыт керек экенин, бирок Израиль “бул согушту аягына мурдагыдан да күчтүүрөөк чыгарарын кошумчалаган.
Израиль менен ХАМАСтын ортосундагы жаңжал
7-октябрда эртең менен Израиль Газа тилкесинен болуп көрбөгөндөй ракеталык чабуулга кабылды. Массалык аткылоодон кийин ХАМАС Израилдин түштүгүндөгү чек ара аймактарына кирип келишкен.
ХАМАСтын аскердик канаты Израилге каршы «Аль-Акса Топон суусу» операциясын жарыялады. Буга жооп катары Израилдин коргонуу күчтөрү Газа тилкесинде «Темир кылыч» операциясын баштаганын жарыялады.
Операциядан бир нече күн өткөндөн кийин Израиль армиясы Газа чек арасына жакын жайгашкан бардык конуштарды өз көзөмөлүнө алып, тилкедеги буталарга, анын ичинде жарандык объекттерге каршы абадан сокку ура баштады.
Мындан тышкары, Израиль Газаны толук блокадага алганын жарыялады: суу, азык-түлүк, электр энергиясы, дары-дармек жана күйүүчү май менен камсыздоо токтотулду.
Эки тараптан тең каза болгон карапайым калктын саны миңден ашты, бир нече миң израилдик жана палестиналык жараат алды.
Укук коргоочулар Израилди Газа жана Ливандагы операцияларда тыюу салынган ак фосфорду колдонуп жатканын айтып чыгышты.
Кечээ, 13-октябрда Израиль армиясы Газа тилкесинин түндүгүндөгү 1,1 миллион палестиналыкка жана БУУнун кызматкерлерине Газанын түштүк бөлүгүнө эвакуацияланууга 24 саат убакыт берген.
БУУнун баш катчысынын расмий өкүлү Стефан Дюжаррик мындай масштабдагы эвакуация «кыйратуучу гуманитардык кесепеттерсиз мүмкүн эмес» экенин айтып, Израилди бул буйрукту жокко чыгарууга чакырган.
Палестиналык ХАМАС кыймылынын басма сөз кызматынын жетекчиси Салама Маруф Израилдин эвакуация тууралуу эскертүүсү “жарандардын арасында баш аламандык жаратууга жана ички биримдикке зыян келтирүүгө багытталган жалган пропаганданы таратуу” аракети экенин айткан


















