Түндүк Атлантика альянсына (НАТО) мүчө өлкөлөрдүн лидерлеринин кезектеги саммити 2026-жылдын июль айында Түркиянын борбору Анкарада өткөрүлөт. Саммит өтө маанилүү чечимдердин кабыл алынышына жол ачат.
Бул тууралуу Түркиянын президенти Режеп Тайып Эрдоган республиканын министрлер кабинетинин жыйынынын жыйынтыгында билдиргенин Anadolu агенттиги жазды.
Түркиянын президенти мындай чечим альянс өлкөлөрүнүн Гаагада өткөн саммитинде кабыл алынганын билдирген.
“Мамлекет башчы аймактагы соңку окуялар, өлкө бийлиги баштаган процесс Түркияда терроризмди жок кылууга багытталган канчалык туура жана стратегиялык кадам экенин тастыктаганын белгиледи”,- деп айтылат маалыматта.
Президент ошондой эле “Түркия өзүнүн улуттук коопсуздугуна каршы ар кандай агрессивдүү аракеттерге чечкиндүү жооп берүүгө даяр” экендигин баса белгилеген.
Эскерте кетсек, 24-25-июнда Гаагада Нидерланддын мурдагы премьер-министри Марк Рюттенин жетекчилиги астында НАТОнун саммити болуп өттү. Ага уюмга мүчө 32 өлкөнүн, ошондой эле бир катар өнөктөш мамлекеттердин башчылары катышкан.
Андагы негизги маселе альянстын мүчөлөрүнүн каржылык милдеттенмелери болуп, коммюникенин чечими 2035-жылга чейин өлкөлөрдүн аскердик чыгымдарынын үлүшүн ИДПнын 2% дан 5%ке чейин көбөйтүү милдеттенмеси болгон.
Мындан тышкары, НАТО саммитинин алкагында бир катар кошумча жолугушуулар болгон. Анын ичинде НАТОнун Башкы катчысы, Украинанын Президенти жана Европа Кеңешинин жана Еврокомиссиянын төрагаларынын жолугушуусунан тышкары Франциянын президенти, Германиянын канцлери жана Италиянын, Польшанын жана Улуу Британиянын премьер-министрлеринин жолугушуулары өткөн.
