Россия Коопсуздук кеңешинин төрагасынын орун басары Дмитрий Медведев АКШнын Иранга жасаган соккуларын кескин айыптап, бирок Москва Тегеранга өзөктүк курал берүү ниети жок экенин билдирди. Бул тууралуу ал X (мурдагы Twitter) социалдык тармагындагы баракчасында англис тилинде жазып, АКШ президенти Дональд Трамптын сынына жооп берди.
«Президент Трамптын тынчсыздануусуна келсек: мен АКШнын Иранга жасаган соккусун айыптайм — ал өз максатына жеткен жок. Бирок Россия Иранга өзөктүк курал берүү ниетинде эмес, анткени Израилден айырмаланып, биз өзөктүк куралды таркатпоого байланыштуу келишимдин катышуучусубуз», — деп жазды Медведев.
Медведев ошондой эле президенттик кызматты аткарып жаткан учурунда РФтин өзөктүк күчтөрүн көзөмөлдөп келгенин, бул маселеде кесепеттерин жакшы билерин белгиледи.
«Бирок башка мамлекеттер муну (берүүнү) жасашы мүмкүн — мен муну гана айттым», — деп кошумчалады ал.
Саясатчынын айтымында, «кимде канча өзөктүк курал бар экенин талкуулап отуруунун кереги жок».
Ал ошондой эле АКШнын мурдагы президенти Барак Обама менен бирге кол койгон Стратегиялык куралдарды кыскартуу боюнча келишим (СНВ) азырынча күчүндө экенин, бирок анын келечеги бүдөмүк бойдон калганын эскертти.
Мурдараак Дональд Трамп Truth Social тармагындагы баракчасында Медведевдин Иранга өзөктүк курал берүү боюнча билдирүүсү чындыкка дал келсе, аны дароо кабарлоону талап кылган. Бирок, чынында, Медведев өзүнүн телеграм-каналында Россия Иранга өзөктүк курал берет деп айткан эмес. Ал АКШнын Ирандагы өзөктүк объекттерге жасаган соккуларынын кесепеттерине токтолуп, Трампты “тынчтык орнотуу ниети менен келген президент, бирок АКШ үчүн жаңы согушту баштады”,- деп сынга алган. Ал тургай, Трампка “Тынчтык үчүн Нобель сыйлыгы” эми жок”,- деп шылдыңдаган.
22-июнга караган түнү Трамп АКШнын Ирандагы үч өзөктүк объект — Фордо, Натанз жана Исфахан боюнча ийгиликтүү сокку жасаганын жарыялаган. Анын айтымында, Тегеран жаңжалдан баш тартууга тийиш. Израиль болсо 13-июндан бери Иранга күн сайын соккуларды жасоодо, анын максаты — Ирандын ракета жана өзөктүк программаларын жок кылуу.















