Улуттук коопсуздук боюнча мамлекеттик комитеттин башчысы Камчыбек Ташиев, Нарын шаарына иш сапары менен барган учурда “Мамлекеттин коопсуздугу калкынын санына жараша болот. Элибиздин саны көбөймөйүнчө коопсуздугубузду биз сактай албай калышыбыз мүмкүн”,- деп билдирүү жасаган.
Ал учурда өкмөттө элдин санын өстүрүүгө багытталган мамлекеттик программа даярдалууда. Ага ылайык, көп бала төрөгөн келиндерге бир жолку төлөнүүчү «эне капиталын» берүү пландаштырылып жаткандыгын кошумчалаган.
К. Ташиевдин айтуусуна карганда, мындан ары төртүнчү баласын төрөгөндөргө 100 миң сом, бешинчиге 600 миң сом, жетинчиге 1 миллион, 8-9 бала төрөгөндөргө 1,5 миллион, ал эми 10ду төрөгөндөргө 2 миллион сомдон берилет.
Ал өз сөзүндө, “Бул кадамга акча ашып-ташыгандан барып жаткан жокпуз. Муктаждык ушундай болуп жатат. Анткени мамлекеттин коопсуздугу калкынын санына жараша болот. Бул — олуттуу маселе», — деген.
Ошондой эле бул программа бийик тоолуу аймактарга гана тиешелүү экенин кошумчалаган.
К. Ташиевдин бул билдирүүсүнөн кийин коомчулукта кызуу талкуу жаралып, соц.тармакта тамаша-чыны аралаш ар кандай пикирлер айтылды. Айрыкча, келиндер көп балалуу болууга ниеттенип, кээ бир келиндер жети баласы бар экендигин айтып чыгышты.
Бирок, социалдык тармактардагы пикирлерге караганда, бала төрөп миллионер болгусу келгендер бир маанилүү шартка көңүл бурбай жатышканай. Анткени, билдирүүлөргө караганда көп балалуу эне, деңиз деңгээлинен 1000 метрден кем эмес бийик жерде жашашы керек. Расмий катталган дареги тоолуу аймакта болушу шарт.
Бишкек шаары – 800 метр
Ош шаары – 963 метр
Жалал-Абад шаары – 763 метр
Каракол шаары – 1690 метр
Нарын шаары – 2044 метр
Талас шаары – 1244 метр
Баткен шаары – 1036 метр
Нилуфар Алимжанова, Жогорку Кеңештин депутаты:
“Элибиздин саны менен өлкөбүздүн коопсуздугубузду, бүтүндүгүн сакташыбыз керек”
– Камчыбек Кыдыршаевичтин бул демилгесин аял катары да, депутат катары да колдойм.
Анткени, учурда пенсия курагындагы кишилердин саны өсүп, жөлөкпул алган жаштардын катары менен тең салмактуулугу бирдей эмес. Ошондуктан биз бул демилгени колдоп, кала берсе колубуздан келишинче жардам да беришибиз керек. Анткени азыр дүйнөлүк практикада элинин саны боюнча да атаандаштык бар.
Элинин саны боюнча дүйнөлүк алдыңкы орундукта Кытай, Индия, АКШ турса, Орусия 9-орунда, Түркия-17, кошуна Өзбекстан 42- орунду көрсөтүп турат.
Бул жагынан алганда, мамлекеттин коопсуздугу калкынын санына жараша болору анык. Ошондуктан, элибиздин саны менен да коопсуздугубузду, өлкөнүн бүтүндүгүн сакташыбыз керек.
Камчыбек Ташиев 8-9 бала төрөгөндөргө 1,5 миллион, ал эми 10ду төрөгөндөргө 2 миллион сомдон берилет деп билдирди. Менимче, буга мамлекеттин казынасынын күчү жетет. Себеби, мамлекет туруктуу, ар тараптуу экономикалык өсүшкө багыт алып, өндүрүштүк иштер менен камсыз боло баштады. Буга далил катары, акыркы бир жыл ичинде ачылган ата-мекендик өндүрүштүк ишканаларды мисал катары келтире алам.
Дагы бир баса белгилеп сунуш катары айтарым, Кыргызстандын шартында көп балалуу үй-бүлөлөргө гана эмес, эне жана баланы колдоо максатында жарык дүйнөгө жаңы келген төрөтканадагы наристелер үчүн да кам көрсөк өтө сонун болмок. Мисалы, Орусиянын төрөтканаларында жаңы көз жарган энелер үчүн да, бала үчүн да жакшы шарттар каралган. Биз да мына ушундай жогорку деңгээлдеги шарттарга жетишибиз керек.
Даярдаган Турдайым Кожомбердиева.



















