Бишкек шаардык сотунун имаратынын алдында «Бүтүн Кыргызстан» партиясынын лидери, Жогорку Кеңештин депутаты Адахан Мадумаровдун тарапташтарынын митинги өтүп жатат.
Митингчилер бийлик Мадумаровду мамлекеттик чыккынчы деп айыптап жатканына нааразычылык билдирип, саясатчыны бошотууну талап кылышууда.
Бүгүн Шаардык сотто Мадумаровдун бөгөт чарасы жана аны кармоонун мыйзамдуулугу каралууда.
Жогорку Кеңештин депутаты, «Бүтүн Кыргызстан» партиясынын лидери Адахан Мадумаровду милициянын атайын даярдыктагы отрядынын кызматкерлери 2-сентябрда кармап кетишкен. Ошол эле күнү Биринчи Май райондук сотунун чечими менен бөгөт чарасы аныкталып, ал 24-октябрга чейин Улуттук коопсуздук боюнча мамлекеттик комитеттин (УКМК) тергөө абагына камакка алынган.
Ички иштер министрлиги (ИИМ) Мадумаровго Кылмыш-жаза кодексинин 323-беренеси («Мамлекеттик чыккынчылык») боюнча айып коюлганын маалымдаган.
Башкы прокуратура Мадумаровду 2009-жылы кыргыз-тажик чек арасы боюнча протоколго кол койгону үчүн жоопко тартууга уруксатты парламенттен быйыл 22-июнда алган. Көзөмөл органынын бир жыл мурдагы ушундай эле сунушуна каршы чыккан парламент бул ирет аны колдоп берген.
Депутатты Кемпир-Абад маселеси боюнча жоопко тартуу сунушу 22-июндагы отурумда колдоо тапкан эмес.
Мадумаров ИИМдин имаратынан чыгып, сотко алып кетип баратканда журналисттерге кыска жооп берип, Баткендеги кыргыз-тажик чек арасы боюнча кол коюлган протоколго байланыштуу кармалганын айтып, муну «жомок» деп баалаган. Ал Коопсуздук кеңешинин катчысы кызматын 2008-жылдын 5-октябрынан 2009-жылдын 26-октябрына чейин аркалаган.