АКШ сенатору Гэри Питерстин мамлекеттер аралык байланышты, парламенттер ортосундагы кызматташтыкты талкуулоо үчүн Борбор Азия мамлекеттерине жасаган иш сапары Кыргызстандан башталды.
Парламенттин басма сөз кызматынан билдиришкендей, америкалык сенатор бүгүн, 21-августта Жогорку Кеңештин төрагасы Нурланбек Шакиев менен жолугушту.
Маалыматка ылайык, жолугушууда Кыргызстан менен АКШнын ортосундагы саясий-экономикалык өнөктөштүктү кеңейтүү, парламенттер аралык кызматташтыкты өнүктүрүү маселелери талкууланды.
Шакиев Жогорку Кеңеш АКШнын Конгресси менен ар тараптуу алаканы арттырууга кызыкдар экендигин белгиледи.
“Сиздин бул иш сапарыңыз мындан аркы байланыштарды чыңдоого өбөлгө түзүп, парламенттер ортосундагы кызматташтыкты бекемдөөгө көмөкчү болот деген ишеничтемин. Анткени, мамлекеттер аралык алаканы өнүктүрүүдө, парламенттердин салымы өтө чоң”, – деди ал.
Муну менен катар соода-экономикалык мамилелерди да алдыга жылдыруу артыкчылыктуу багыт экенин айткан Нурланбек Шакиев билим берүү да жаатында кызматташтыкты кеңейтүү зарылчылыгына токтолду.
“Биздин жарандар, айрыкча жаштар АКШнын алдыңкы окуу жайларынан билим алууга ынтызар. Андыктан, тиешелүү мүмкүнчүлүктөрдү түзүп, виза алуу шарттарын жеңилдетүү маселесине көңүл бурууга чакырам”, – деп кошумчалады төрага.
Өз кезегинде сенатор Гэри Питерс жылуу кабыл алгандыгы үчүн Шакиевге ыраазычылык билдирди.
Ошондой эле мамлекеттер аралык байланышты, парламенттер ортосундагы кызматташтыкты талкуулоо үчүн Борбор Азия мамлекеттерине жасаган бул иш сапары Кыргызстандан башталганын баса белгиледи.
“АКШ Кыргызстан менен байланышты өнүктүрүүгө ар дайым кызыкдар. Ага ылайык, бул жолугушуубузда көтөрүлгөн бардык сунуш-пикир биз үчүн өтө маанилүү”, – деди сенатор.
