Мунай продуктыларды Казакстан аркылуу Кыргызстанга өткөрүү боюнча маселе жок, өлкөдө күйүүчү-майлоочу майдын тартыштыгы болбойт. Бул тууралуу «Кыргыз темир жолу» мамлекеттик ишканасынын маалымат кызматы кабарлады.
Кечээ, 3-октябрда Кыргызстандын мунай ташуучулар ассоциациясы Россиядан ташылган күйүүчү майларды Казакстан аркылуу алып өтүүдө кыйынчылыктар пайда болгонун билдирген.
«Кыргыз темир жолу» мамлекеттик ишканасынан билдиришкендей, бүгүн 4-октябрда Астана шаарында «Кыргыз темир жолу» УК» мамлекеттик ишканасынын Башкы директору А.Сакиев менен «Казакстан темир жолы» УК» АК башкармалыгынын Төрагасы Н.Сауранбаевдин жолугушуусу болду.
Анда жүк ташууну уюштуруунун актуалдуу маселелери талкууланып, 2023-жылдын 9 айынын жыйынтыгы боюнча жүк ташуунун көлөмү көбөйгөнү белгиленген.
“Өлкөлөр ортосунда темир жол транспорту менен жүк ташуунун көлөмү өткөн жылдын ушул мезгилине салыштырмалуу 10% га өсүп, 4 млн тоннаны түздү. Казакстандын аймагы аркылуу Кыргызстанга транзит 11% га, 2,6 млн. тоннага чейин өскөн. Казакстандан Кыргызстанга экспорт 1,5 млн. тоннаны түзүп, 16% га көбөйдү. Тараптар Казакстандын аймагы аркылуу биринчи кезекте социалдык-маанилүү мүнөздөгү жүктөрдү толук көлөмдө транзит менен өткөрүү боюнча биргелешкен ташуулардын пландарын макулдашышты”, – деп айтылат билдирүүдө.
Ишканадан белгилешкендей, үстүбүздөгү жылдын октябрына карата «Казакстан темир жолы» УК» АК 144 миң тонна көлөмүндөгү мунай продуктыларынын транзит көлөмүн макулдашты. Ошол эле учурда 24,5 миң тонна мунайзат Кыргызстанга жолдо бара жатат.
Жолугушууда Казакстан аркылуу Кыргызстанга транзиттик жүктөрдү өткөрүү, анын ичинде мунай продуктылары боюнча көйгөйлүү маселелер жок экендиги белгиленди.
Ишкана Казакстандан Кыргызстанга күйүүчү-майлоочу майдын транзити токтотулду деген маалымат жалган жана чындыкка дал келберин, Кыргызстандын рыногунда мунайзаттардын тартыштыгы пайда болот деген кооптонуулар негизсиз экенин белгиледи.
“Маалыматты таратууда “экинчи” тараптын пикирин эске алуу жана маалыматтык билдирүүлөрдө коңшу республиканын чек арасы аркылуу КММ транзит маселелерин тейлеген профилдик мамлекеттик органдын позициясын көрсөтүү керектигине көңүл буруу керек. Болбосо, текшерилбеген маалыматты жайылтуу эки тараптуу сүйлөшүүлөрдүн жүрүшүнө гана эмес, эки өлкөнүн өз ара мамилелерине да таасирин тийгизиши мүмкүн. Азыркы учурда Кыргызстан менен Казакстандын темир жол администрациялары жүктөрдүн кыймылын толугу менен көзөмөлдөп, жүктөрдү белгиленген жерге чейин үзгүлтүксүз жана туруктуу жеткирүүнү камсыз кылуу максатында тыгыз байланышта турушат. Жетишилген макулдашууларга ылайык, «Казакстан темир жолы» УК» АК Казакстандын аймагы аркылуу Кыргызстанга/андан келип түшкөн транзиттик жүктөрдү өз убагында макулдашууну камсыз кылат”, – деп айтылат «Кыргыз темир жолу» мамлекеттик ишканасынын билдирүүсүндө.
