Бул тууралуу 12-декабрда Баткен шаарында эки өлкөнүн чек араны чечүү чечүү боюнча мамлекеттик комиссияларынын жетекчилери, КРнын УКМКнын төрагасы Камчыбек Ташиев жана Тажикстандын улуттук коопсуздук кызматынын башчысы Саймумин Ятимовдор баштаган делегациянын жолугушуусунда айтылды. Жакын арада чек аранын калган бөлүгү да аныкталып, толук бойдон чечилүү алдында турат.
К. Ташиев С. Ятимов менен биргеликте маалымат каражаттарына билдирүүсүндө мындай деди:
– Урматтуу журналисттер, мен урматтуу Саймумин Сатаровичтин сөздөрүн бекемдеймин. Биздин жумушчу комиссияларынын ишинде негизинен мамлекеттик чек аранын баардык бөлүгүн макулдаштык. Жакынкы мезгилде 90%дан ашык аймак макулдашылды. Жакын арада белгиленүү алдында турат. Болгону бир нече гана участкалар калууда жана аларды да Кудай буюрса, жакында аяктайбыз. Бул кайсы участкалар? Алар Кайрагачтан баштап Кулунду, Максат, Арка, Арка-1, Арка-2, Жаңы-Жер жана Жийделикке чейин биз толук жумушчу топ макулдаштык. Мындан тышкары биз Кара-Булак, Ляккан, үч мамлекеттин чек арасына чейинки аймакты макулдаштык. Ошентип биз бүгүнкү күндө талаштуу деп эсептелген аймактарды дээрлик макулдашып бүттүк. Эми мамлекеттик чек араны толук чечүү үчүн болгону бир нече жолугушууларды өткөрүү калды. Мен жумушчу комиссиянын эки өлкөнүн тең баардык курамына ыраазычылык билдирем. Анын ичинде урматтуу Саймумин Саттаровичке биз эң жакшы иш жүргүзгөндүгүбүз үчүн. Рахмат.
Ал эми С. Ятимов ошол эле биргелешкен билдирүүдө буларга токтолду:
– Урматтуу достор, бүгүн Кыргыз Республикасынын Баткен облусунун Баткен шаарында биз эки тараптуу комиссиянын жумушчу жолугушуусун өткөрүп, турмуштук маанилүү маселелерди талкууладык. Биз дагы бир жолу эки өлкөнүн ортосунда жалпы кызыкчылык жана максаттар бар экендигине ынындык. Албетте, жалпы иштер да бар. Бул кызыкчылыктардын логикалык жыйынтыгы биздин элдердин келечегине байланышкан. Бул биздин өлкөлөрдүн коопсуздугу жана социалдык-экономикалык жактан өнүгүүсү.
Бүгүнкү күнгө карата жетиштүү деңгээлде чоң жумуш аткарылды. Биз бүгүнкү күндө 120 км.ден ашык аймакты макулдашып, бул маселелерди принципиалдуу түрдө чечтик. Эгер Тажикстан Республикасы менен Кыргыз Республикасынын жалпы мамлекеттик чек арасын ала турган болсок, бул сөзүмдү Камчыбек Кыдыршаевич да бекемдесе керек, 90%дан ашык аймак белгиленди. Биз чындап эле бул маселелерди чечүүгө жакындап калдык. Комиссия калган чек ара аймактарын чечүүгө олуттуу мамиле жасайт. Алар биздин мамлекет башчыларыбыздын эки элдин кызыкчылыгына дал келген тапшырмаларын так аткарышууда. Мен эки комиссияга тең ийгиликтүү иштешкендиги үчүн ыраазычылык билдирем. Рахмат.
Белгилей кетүүчү жагдай, президент Садыр Жапаров 11-декабрда Баткендин Ак-Сай айылында жаңы курулган мектептин ачылышында сүйлөп жатып, Тажикстан менен чек ара 2024-жылдын жаз айына чейин такталып каларын айткан. Бийлик ага чейин чек араны тактоо иштери ушул жылдын аягына чейин бүтөрүн билдирген.
Кыргыз-тажик чек арасын делимитациялоо жана демаркациялоо боюнча өкмөттүк делегациялардын топографиялык жумушчу топторунун 29-ноябрдан 5-декабрга чейин Тажикстандын Бустон шаарында өткөн жолугушуусунда чек аранын дагы 24 чакырымы такталганы айтылган.
Кыргызстан менен Тажикстандын чек арасынын жалпы узундугу 972 чакырымды түзөт. 2002-жылдан 2020-жылдарга чейин чек аранын 519 чакырымы такталса, 2022-жылы эки өлкөнүн президенттери жолукканда жалпысынан 664 чакырым тилке боюнча орток пикир бар экенин ырасташкан.



















