Россиянын Новосибирск шаарындагы тажик мигранты үч жылдан бери кичи мекени Ворухка кете албай жатканын билдирди.
Исфара районунун Ворух айлынын тургуну Диловар Жураев 2021-жылы 8-ноябрда Новосибирск шаарында кармалган. Кыргыз бийлиги тажикстандыкты чек арадагы жаңжалда жапырт башаламандыкты уюштурууга жана бейбаштыкка айыптоодо. Диловар Жураев бир нече күндөн кийин Тажикстандын Башкы прокуратурасынын өтүнүчү менен бошотулган. Анын орус жарандыгы жокко чыгарылып, азыр Жураевдин убактылуу жашоого гана уруксаты бар.
20-августта ал Новосибирсктен телефон аркылуу “Озоди” радиосу менен байланышып, мекенине кете албай жатканын айтты:
“Бул аралыкта атам каза болуп, мен сөөк коюуга да бара албай калдым. Алар мени коё бербей коюшту. Новосибирск милициясынын кызматкерлери мени тергөө абагына көп алып келишет. Мен Орусиянын Башкы прокуратурасына өлкөдөн чыкпоо чечимин жокко чыгаруу өтүнүчү менен кайрылгам, азыр жооп күтүп жатам”.
Тажикстандын Новосибирсктеги консулдугунун кызматкери кырдаалдан кабардар экенин билдирди.
– Биз буга чейин аны менен бир нече жолу байланышканбыз жана Жураевди дагы чакырып, бул маселени чечүү үчүн айрым жагдайларды тактайбыз.
2021-жылы 28-апрелден 1-майга чейин кыргыз-тажик чек арасында болгон куралдуу жаңжалда Кыргызстан тараптан 36 киши (арасында эки бала) курман болуп, 180ден ашуун адам жаракат алган. Жалпы 136 үй, бир нече мектеп, бала бакча жана башка социалдык объектилер өрттөлүп, талкаланган.
Тажикстандан 19 киши өлүп, 87си жарадар болгону расмий кабарланган. Эки өлкө бири-бирин айыптап, кылмыш иштерин козгошкон.
