Казакстан 1-марттан тарта расмий түрдө UTC+5 бирдиктүү убакыт алкагына өттү.
1-мартка караган түнү саат 00:00дө республикалык маанидеги шаарларда: Астана, Алматы жана Чымкентте, ошондой эле: Абай, Акмоло, Алматы, Чыгыш Казакстан, Жамбыл, Жетысу, Караганды, Костанай, Павлодар, Түндүк Казакстан, Туркстан, Улытау облустарында убакыт өзгөрдү.
Актөбө, Атырау, Батыш Казакстан, Кызылордо жана Маңгыстау облустарында убакыт өзгөргөн жок, анткени бул аймактарда ансыз да UTC+5 убакыт алкагы иштеп жаткан.
Казакстан бирдиктүү убакыт алкагына өтүүгө даярданып жатканы декабрь айынын башында маалымдалган.
Буга чейин Казакстан эки убакыт алкагын колдонгон: UTC+5 жана UTC+6. Өлкөнүн көпчүлүк аймагы (батыш аймактарды кошпогондо) UTC+6 зонасында болгон.
19-январда Казакстандын өкмөтү 1-марттан тарта өлкө UTC+5 бирдиктүү убакыт алкагына өтөрүн бекиткен.
