Тажикстандын чек арачылары Казакстандын Улуттук коопсуздук комитетинин Чек ара академиясында окушат.
Бул тууралуу Казакстанда талкууга коюлган эки өлкөнүн министрлер кабинетинин макулдашуу долбоорунда айтылганын Sputnik Казакстан агенттиги жазды.
Макулдашуу ЖККУнун, ЕАЭБдин жана КМШнын документтеринин жоболоруна негизделгени түшүндүрмө катта белгиленген.
Окуу учурунда казак тарап тажикстандык студенттерди турак жай, тамак-аш, форма, окуу куралдары жана стипендия менен камсыздайт.
Тажик тарап талапкерлерди Казакстан жыл сайын белгилеген квотага ылайык тандап алышы керек.
Документте талапкерлер үчүн айрым талаптар көрсөтүлгөн – алар кызмат өтөй элек 17 жаштан 21 жашка чейинки мектеп жана колледж бүтүрүүчүлөрү болушу керек.
Аскерге чакырылган жоокерлер үчүн кабыл алуу учурунда 24 жаштан, ал эми контракт боюнча кызмат өтөгөн жоокерлер үчүн 25 жаштан чектелет.
Тажик тарап чек арачы студенттердин окуу боюнча арызын окуу жылынын башталышына алты ай калганда тапшырышы керек.
Документ талкууда 10-октябрга чейин калат.



















