Катар Тажикстанга Рогун ГЭСин куруу үчүн 50 млн доллар жеңилдетилген насыя берет. Бул тууралуу келишимге 23-августта Душанбе шаарында Тажикстандын финансы министри Файзиддин Каххорзода жана Катар Өнүктүрүү фондунун башкы директору Фахд Хамад Аль-Сулейти кол коюшту.
Тажикстандын Финансы министрлигинин билдиришинче, каражат Рогун долбоорун ишке ашырууга багытталат. Бул долбоор өлкөнүн энергетикалык коопсуздугун чыңдап, ички жана аймактык керектөөлөр үчүн электр энергиясын өндүрүүнү кеңейтүүгө мүмкүнчүлүк берет. Келишимдин шарттары тууралуу майда-чүйдө маалыматтар жарыяланган жок.
Жолугушууда тараптар эки тараптуу кызматташууну кеңейтүү мүмкүнчүлүктөрүн жана Фонддун башка мамлекеттик приоритеттүү долбоорлорду ишке ашырууга катышуусун да талкуулашты.

Катар Өнүктүрүү фондунун делегациясы ошондой эле Тажикстанда президент Эмомали Рахмон менен сүйлөшүүлөрдү өткөрдү.
Эске салсак, буга чейин Тажикстан Катар Өнүктүрүү фонду менен Рогун ГЭСинин курулушун улантуу үчүн гранттык каражат тартуу боюнча сүйлөшүүлөрдү жүргүзгөн. 2024-жылдын октябрь айында Дохага болгон иш сапарынын алкагында Эмомали Рахмон Катарга Тажикстандын приоритеттүү долбоорлорун каржылоо үчүн биргелешкен экономикалык жана инвестициялык фонд түзүүнү сунуштаган.


















