Непал бийлиги чет элдиктер үчүн дүйнөнүн эң бийик чокусу Эверестке чыгуу акысын кымбаттатты. Аны менен катар аталган тоодогу таштандылар жана кырсыктар менен күрөшүүгө багытталган бир нече чараларды киргизди.
Бул тууралуу Непал Министрлер кабинетинин чечимине таянып, “Kathimandu Post” басылмасы жазып чыкты.
Жаңы эрежеге ылайык, чет өлкөлүктөр үчүн альпинизм акысы жазгы сезондо (март-май) 11 миң доллардан 15 миң долларга, күзгү мезгилде (сентябрь-ноябрь) 5 миң 500 доллардан 7500 долларга чейин, ал эми кыш мезгили (декабрь-февраль) менен жаан-чачындуу убактарда (июнь-август) – 2,75 миң доллардан 3,75 миң долларга чейин көтөрүлгөн.
Мындан сырткары, ар бир эки альпинист бийиктиги 8000 метрден ашкан тоолорго, анын ичинде Эверестке (түштүк чокусу 8760 метр бийиктикте) чыгуу үчүн гид жалдашы керек деген чечим чыгарды.
Документке ылайык, жаз мезгилинин башталышы менен альпинисттер да таштандыларды тоонун түбүндөгү лагерге ташып келүүгө, ошондой эле таштандыны бийик жерлерге чогултуу үчүн биологиялык ажыроочу баштыктарды алып жүрүүгө милдеттендирилди.
Непал менен Кытайдын чектеш жеринде жайгашкан Эверест чокусунун эң бийик жери – деңиз деңгээлинен 8 848 метрди түзөт. Буга чейин чокуга 10 миңге жакын киши чыгып, дагы 300дөй киши ага жетпей, орто жолдо каза тапкан.
Эверестти биринчи жолу багындырышкан Эдмунд Хиллари 2008-жылы 88 жаш курагында, Тенцинг Норгей 1986-жылы 71 жаш курактарында каза табышкан. Ал эми чокуга эң биринчи жолу кычкылтек баллонун колдонбой италиялык альпинист Райнхольд Месснер жеткен.
Дүйнөнүн бул эң бийик чокусун кыргызстандык төрт альпинист багындырган. Алар: Дмитрий Греков – 1997-жылы, экинчиси Эдуард Кубатов – 2021-жылы 23-майда, үчүнчүсү Кадыр Сайдилкан 2023-жылы 17-майда, ал эми төртүнчүсү Илим Карыпбеков 2024-жылы 23-майда чокуга аман-эсен чыгып түшүшкөн.


















