Түркиянын президенти Режеп Тайып Эрдоган кечээ, 4-ноябрда, Кыргызстанга мамлекеттик иш сапар менен келди. Бул тууралуу президенттин маалымат кызматы кабарлады.
Түрк лидерин эл аралык “Манас” аэропортунан өлкө башчы Садыр Жапаров өзү тосуп алды. Эки элдин президенттерин биринчи канайымдар коштоп жүрдү.
Флагштокторго эки өлкөнүн желектери илинип, килем төшөлдү, улуттук боз үй түрүндө инсталляция орнотулуп, Ардак кароол тизилди.
Мамлекет башчылары жана алардын жубайлары кыргыз жана түрк музыкалык чыгармаларын аткарган кыргыз артисттеринин концерттик программасын көрүштү.
Мамлекеттик сапардын алкагында эки өлкөнүн президенттеринин чакан курамдагы сүйлөшүүлөрүн, ошондой эле эки мамлекет башчыларынын төрагалыгы алдында Стратегиялык кызматташтыктын жогорку кеңешинин алтынчы жыйынын өткөрүү пландаштырылган, анын жүрүшүндө тараптар кыргыз-түрк өз ара аракеттенүү маселелеринин кеңири спектрин талкуулашат.
Сапардын жыйынтыгы боюнча эки өлкөнүн стратегиялык кызматташтыгын кеңейтүүгө жана мамлекеттер аралык мамилелерин мындан ары чыңдоого багытталган бир катар эки тараптуу документтерге кол коюу пландаштырылууда.
Ошондой эле, 6-ноябрда Түркиянын президенти Режеп Тайып Эрдоган Түрк мамлекеттер уюмунун саммитине катышат.
