Түркиянын президенти Режеп Тайип Эрдоган Батыш өлкөлөрү Украинага салыштырмалуу Газага алда канча аз көңүл буруп, аз жардам берип жатканын билдирди.
Анын айтымында, Батыш Газага Украинага көрсөткөн колдоосунун төрттөн бирин да берген жок.
“Тилекке каршы, Батыштын Украинанын элине көрсөткөн мамилесинин төрттөн бирин да Газадан көрө алган жокпуз. Табак көтөрүп, бир аз тамак алуу үчүн кезекте турган балдарды көрүп туруп, көрмөксөнгө салгандар уялсын. Алардын абалы ачык көрүнүп турат. Биз Батыштан адамкерчиликтүү мамилени күтөбүз. Кандын жана көз жаштын бардык аймактарда токтошун каалайбыз”, – деди түрк лидери.
Бул тууралуу ал Кытайда өткөн Шанхай кызматташтык уюмунун (ШКУ) саммитине катышып келгенден кийин учакта журналисттерге билдирди.
Эрдоган Газадагы кырдаал эл аралык коомчулуктун дагы активдүү кийлигишүүсүн талап кылаарын баса белгиледи. Ал Батышты аймактын тургундарына көбүрөөк мээримдүүлүк көрсөтүүгө чакырды.


















