Йемендик “Ансар Аллах”( хуситтер) кыймылы америкалык “Авраам Линкольн” аскердик кемесине жана АКШнын эки эсминецине чабуул жасашканын кыймылдын аскерий өкүлү Яхья Сариа билдирди.
Хуситтердин аскер-аба күчтөрү эки атайын операция жүргүзгөн. Алардын биринде Араб деңизинде америкалык “Авраам Линкольн” кемесине чабуул жасалган. АКШнын дагы эки эсминецине Кызыл деңизде сокку урулган. Кол салуулар ракеталар жана учкучсуз учактар менен жасалганын Сариа билдирди.
Анын айтымында, операциялар сегиз саатка созулуп, кыймыл «максатына жетти». Сариа белгилегендей, хуситтер «Кызыл деңизди аскерий чыңалуу аймагына айлануусуна АКШ менен Улуу Британияны жооптуу» деп эсептешет.
Пентагондун басма сөз катчысы Патрик Райдер брифингде йемендик хуситтер америкалык эки эсминецке кол салганын тастыктады.
“АКШ армиясынын борбордук командачылыгынын күчтөрү Баб аль-Мандеб кысыгынан өтүп бара жатып бир нече хусилердин чабуулун ийгиликтүү кайтарды. USS Spruance жана USS Stockdale ракеталык эсминецтери кеминде сегиз дрон, беш кемеге каршы баллистикалык ракета жана кемеге каршы уч канаттуу ракеталардын чабуулуна кабылды. Кемелер зыянга учураган жок, экипаж жабыркаган жок”, – деди ал.
Белгилей кетсек, Йемендин Кызыл деңиз жээгинин басымдуу бөлүгүн көзөмөлдөгөн “Ансар Аллах” аскердик-саясий кыймылы Газа тилкесиндеги кагылышуулардын фонунда Палестинаны колдой турганын жана Израил менен байланышы бар бардык кемелерге кол салуу ниетин жарыялап, башка өлкөлөрдү алардан өз экипаждарын чыгарып кетүүгө жана деңизде аларга жакындабоого чакырган. Ошол эле учурда хуситтер аймактагы кеме жүрүү эркиндигине тоскоол болбогонун жана башка өлкөлөрдүн кемелерине тийбей турганын баса белгилешкен. Кол салуулардан улам кээ бир компаниялар Кызыл деңиз аркылуу ташууну токтотууну чечишкен.
Өз кезегинде АКШ менен Улуу Британия январдын ортосунан бери хуситтердин буталарына сокку уруп, муну алардын Кызыл деңиздеги аракетине жооп деп аташкан. “Ансар Аллах” кыймылынын жогорку саясий кеңешинин мүчөсү Мохаммед Али аль-Хуси бул чабуулдарды террордук жапайычылык деп атаган.


















