Израилдин Коргоо армиясы (ЦАХАЛ) Газа шаарынын чыгышындагы Эш-Шужаия аймагында кургактан операция башталганын жарыялады.
“Акыркы бир нече саатта Израилдин аскерлери коопсуздук зонасын кеңейтүү максатында Газа тилкесинин түндүгүндөгү Эш-Шужаия аймагында кургактан операция баштады”, — деп айтылат Израиль армиясынын басма сөз кызматынын билдирүүсүндө.
Күн мурун Израилдин Газанын чыгышындагы жер которгондор жашаган мектепти аткылоосунан кеминде 25 киши каза болуп, 100дөй киши жараат алганын палестиналык “Аль-Акса” телеканалы билдирди.
“Al-Jazeera” телеканалынын маалыматына караганда, соккулар Хан Юнис шаарларындагы турак жайларга жана качкындардын чатырларына жасалган. Дейр эль-Балах шаарында полиция патрулуна кол салуу болуп, үч полиция кызматкери жана бир бала набыт болгон.
Газа тилкесинин Саламаттыкты сактоо министрлигинин маалыматына караганда, анклавда 18-марттан бери каза болгондордун саны 1100дөн ашты, 2700дөн ашуун адам жаракат алды.
18-мартка караган түнү Израилдин Коргоо армиясы Газа тилкесине сокку урууну кайра баштаган. Израилдин премьер-министри Биньямин Нетаньяху чабуулдар ХАМАСтын ок атышпоону узартуу жана барымтадагыларды бошотуу боюнча АКШнын планын кабыл алуудан баш тартканы үчүн уланганын билдирди.
ХАМАС аскердик аракеттердин кайра жанданышы үчүн жоопкерчиликти Израиль менен АКШга жүктөдү.
Израиль менен ХАМАСтын ортосундагы ок атышпоо келишими 1-мартта расмий аяктады, бирок ортомчулардын Газадагы жөнгө салуу боюнча сүйлөшүүлөрдү улантууга тараптарды тартуу аракетинен улам аскердик аракеттер кайра жанданбай турган. Бирок Израиль тилкедеги тузсуздандыруучу ишканага электр энергиясын берүүнү токтотуп, гуманитардык жүк ташуучу унаалардын тилкеге киришин жапты.
19-январдан 1-мартка чейин Газа тилкесинде Израиль менен палестиналык ХАМАС кыймылынын ортосундагы палестиналык туткундардын ордуна израилдик туткундарды бошотуу келишиминин биринчи этабынын алкагында ок атышпоо келишими күчүндө болчу. Алты аптанын ичинде ХАМАС барымтадагы 30 израилдикти бошотуп, каза болгондордун сегизинин сөөгүн өткөрүп берди. Буга жооп кылып Израиль 1700гө жакын палестиналык туткундарды бошотуп, ЦАХАЛ анклавдын ички аймактарынан чыгып кеткен. ХАМАС учурда дагы 59 кишини барымтада кармап турат.
2-мартка караган түнү Газа тилкесинде 42 күнгө созулган макулдашылган ок атышпоо келишиминин мөөнөтү аяктагандан кийин Израиль бийликтери АКШ президентинин атайын өкүлү Стивен Уиткофф Газадагы убактылуу элдешүүнү узартуу боюнча жаңы планды сунуштаганын, анткени азыркы учурда Израиль менен ХАМАСтын ортосундагы согушту толук токтотууга байланыштуу пикир келишпестиктерди жеңүү мүмкүн эмес экенин жарыялаган. Израилдин премьер-министри Биньямин Нетаньяхунун кеңсеси Израиль бул планга макул экенин, бирок ХАМАС макул болбогонун баса белгилеген.
ХАМАС өз кезегинде Газа боюнча келишиминин экинчи этабына өтүүнү талап кылууда, анда согушту толук токтотуу жана анклавдан израилдик аскерлерди чыгаруу каралган.


















