Ирандын куралдуу күчтөрүнүн элиталык бөлүгү болуп саналган Ислам революциясынын сакчылар корпусу (ИРСК) массалык башаламандыктарга аралашкан террордук уюмдарга каршы күрөшүүдө жардам көрсөткөнү үчүн өлкө жарандарына ыраазычылык билдирди. ТАСС агенттигинин кабарчысы маалымдагандай, мындай билдирүү ирандык SIM-карталарды колдонгон абоненттерге жөнөтүлгөн.
«Урматтуу Ирандын жарандары, сиздердин активдүү катышууңуздардын аркасында сионисттик-америкалык тектеги көп сандаган террордук тармактар аныкталып, жок кылынды жана бул багыттагы операциялар улантылууда. Түз байланышка жөнөтүлгөн 400 миңден ашуун билдирүү сиздердин ишенимиңиздерди жана колдооңуздарды айгинелеп турат», — деп айтылат жөнөтүлгөн СМС-билдирүүлөрдө.
Ирандагы башаламандыктар 29-декабрда, риалдын курсунун кескин түшүшүнөн улам көчө нааразылык акциялары башталып, кийин өлкөнүн көпчүлүк ири шаарларына жайылган учурда башталган.
Бийликтердин маалыматына ылайык, бул мезгилде укук коргоо органдарынын болжол менен 40 кызматкери каза болгон. Ирандын тышкы иштер министри Аббас Аракчинин айтымында, 8-январдан тарта нааразылык акцияларына куралчан террорчулар катыша баштаган. Иран бийлиги башаламандыктарды уюштуруудагы жоопкерчиликти Израиль менен АКШга жүктөгөн.



















