Индиянын түштүгүндөгү Тамилнад штатында актер, саясатчы Жозеф Виджай Чандрасехар өткөргөн саясий митингдеги тепсендиден 39 адам, анын ичинде 10 бала каза тапты. Дагы 100дөй демонстрант жараат алды. Бул тууралуу India Today агенттигинин маалыматына таянып Кommersant.ru басылмасы жазды.
“Окуя 27-сентябрда болгон. Митинг түштөн кийин башталышы керек болчу, бирок Виджай жана анын командасы жети саатка кечигип келишти. Бул убакыттын ичинде аянтка 27 000 адам чогулган. Ага чейин болжол менен 10 000 адамдын келери күтүлгөн”,- деп айтылат маалыматта.
Белгилүү болгондой, митингчилер катуу ысыкта бир нече саат бою тамак-ашсыз жана суусуз турушкан.
Ал эми саясатчынын өкүлдөрү муну четке кагып, партиянын юристи бул кечигүүнү жолдун абалы менен байланыштырган.
“Кечигүүгө жол кыймылынын начардыгы себеп болду. Ошол себептүү биз көздөгөн жерибизге өз убагында жете албай калдык”, – деген ал.
Тамилнад штатынын өкмөтү Виджайды митингдин эрежелерин бузду деп айыптады. Алардын айтымында, митингдин уюштуруучулары катышуучуларды тамак-аш жана суу менен камсыз кыла албай, алар эс-учун жоготкон.
Митингде 39 адам набыт болсо, алардын 10у жашы жете элек балдар болгон. Мындан тышкары дагы 100гө жакын митингчилер ар кандай жараат алышкан.
Жабырлануучулардын эң кичүүсү эки жашта болгон. Виджай жакынын жоготкондордун үй-бүлөсүнө 20 миң рупий жана жабыркагандарга 2 миң рупий төлөп берүүнү убада кылган.
Индиянын премьер-министри Нарендра Моди бул окуяны “кайгылуу” деп атады.
Басылма белгилегендей, бул окуя акыркы жылдары саясий жана диний жыйындардагы трагедиялар байма-бай катталып турган дүйнөдөгү эң көп калктуу өлкөдө массалык иш-чараларды башкаруудагы кыйынчылыктарды дагы бир жолу көрсөткөн.


















