Палестиналык ХАМАС кыймылы АКШ тараптан сунуштар алынгандан кийин бардык израилдик барымтадагыларды бошотуу маселесин талкуулоо үчүн “сүйлөшүү үстөлүнө” дароо отурууга даяр экенин билдирди. Бул – ок атууну токтотуу жана Газа секторунан аскерлерди чыгаруу боюнча так жарыя менен алмашуу шартында каралууда.
Бул тууралуу кыймылдын Telegram-каналында жарыяланган билдирүүдө айтылат.
“Биз ортомчулар аркылуу АКШ тараптан ок атышууну токтотуу боюнча бир нече идея алдык. Ушуга байланыштуу ХАМАС элибизге каршы агрессиянын токтотулушуна өбөлгө түзгөн бардык кадамдарды колдойт жана бардык барымтадагыларды бошотуу маселесин талкуулоо үчүн сүйлөшүү үстөлүнө дароо отурууга даяр экенин билдирет. Бул – согуштун токтотулушу тууралуу так жарыя, Газа тилкесинен аскерлерди толук чыгаруу жана бул аймакты башкаруу үчүн көз карандысыз палестиналыктардан турган комитетти түзүү шартында ишке ашырылууга тийиш”, – деп айтылат билдирүүдө.
ХАМАС ошондой эле “душмандан бул келишимди сактай турганы тууралуу так кепилдик алынгандан кийин, ыйгарым укуктарды дароо технократтар комитетине өткөрүп берүүгө даяр экенин” билдирди.
Буга чейин АКШнын президенти Дональд Трамп ХАМАС кыймылын АКШнын Газадагы тынчтык келишиминин шарттарын кабыл алууга чакырып, бул “акыркы эскертүү” экенин билдирген.. Анын айтымында, Израил бул шарттарга макул болду.
“Бардыгы барымтадагылар үйүнө кайтып келүүсүн каалайт. Бардыгы бул согуштун токтошун каалайт! Израил менин шарттарыма макул болду. Эми ХАМАС да аларды кабыл ала турган учур келди. Мен ХАМАСты баш тартуунун кесепеттери тууралуу эскерттим. Бул менин акыркы эскертүүм, мындан башкасы болбойт!” – деп жазды Трамп Truth Social социалдык түйүнүндөгү баракчасына.


















