ХАМАС Газадагы ок атышпоо келишиминин алкагында туткундарды алмашуунун биринчи этабында эркиндикке чыккан палестиналык туткундарды жылуу тосуп алуусу каршылык көрсөтүүгө болгон элдин колдоосунун көрсөткүчү экенин баса белгиледи.
«Eurasia Today» агенттигинин маалыматына ылайык, ХАМАС билдирүүсүндө Палестина калкын, Ислам Үммөтүн жана дүйнө жүзүндөгү бардык эркиндик колдоочуларын “Аль-Акса бороону” келишиминин алкагында сионисттик режимдин абактарынан палестиналык туткундардын биринчи тобунун бошотулушу менен куттуктады.
Билдирүүдө Палестина элинин кубанычы жана эркиндикке чыккан туткундар менен болгон жолугушууда айтылган жеңиш ураандары элдин каршылык көрсөтүүгө болгон колдоосун дагы бир жолу баса белгилеп, алардын аң-сезиминде маанилүү орунду ээлегенин тастыктаганы белгиленди.
Белгилей кетүүчү жагдай, 20-январга караган түнү барымтадагы үч израилдик аялды бошоткон ХАМАС тобу менен алмашуунун алкагында Израил 90 палестиналык туткунду бошотту.
Бошотулгандардын арасында 69 аял бар, анын ичинде бирөөсүнүн жашы жете элек. Мындан тышкары 12 эркек бар жана алардын сегизинин жашы жете элек.
Палестиналык туткундар бошотулар алдында Иерусалимдин жанындагы Офер түрмөсүнө жеткирилип, өздүгү текшерилип, медициналык кароодон өткөрүлдү.
78 киши Батыш жээкке, дагы 12 киши Чыгыш Иерусалимге жөнөтүлгөн.
Катардын Al Jazeera телеканалынын маалыматына караганда, бошотулгандардын арасында Палестина бийлигинин Европа Кеңешиндеги өкүлү жана Палестинаны боштондукка чыгаруу элдик фронтунун туткундар комитетинин башчысы Халида Жарар да бар.
Ондогон демонстранттар камактагыларды бошотуу алдында Офер түрмөсүнүн алдына чогулушкан. Израилдин аскерлери аларды кууп таратуу үчүн күч колдонуп, бери дегенде жети киши жарадар болгонун телеканал билдирди.
Бир күн мурун, 19-январда ХАМАС үч израилдик барымтадагыларды: Роми Гонен (24), Эмили Дамари (28) жана Дорон Штайнбрехерди (31) бошотуп, Кызыл Крестке өткөрүп берген. Бул алмашуу ок атышууну токтотуу келишиминин биринчи фазасынын бир бөлүгү болуп саналат. ХАМАС барымтадагы 97 израилдиктин 33үн бошотууну пландап жатат, ал эми Израил келишимдин алкагында 2000дей палестиналык туткунду бошотот.


















